Pagina:Decurtins - Rätoromanische chrestomathie, VIII.djvu/451

Da Wikisource.
Jump to navigation Jump to search


Durante ils sês ans cha Gudench füt militar, sia condotta füt vairamaing … esemplara, e s' aviand el saimper dô granda … paina per s' instruir saja in ogni manôvra, sco eir nella lingua francesa cur ch' el turnet a chesa, per passer la sted cun sieus genituors eira 'l gia offiziel!

Inmensa füt l' algrezcha da sieus genituors e Nina (chi per uschè dir faiva part della famiglia) da revair lur amô figl, uschè bel vstieu d' offiziel, ma sur tuot, grazius e affabel cun tuots!

O sco uossa nun partast pü al dschaivan suvenz tuots trais, tü stets saimper cun nus, nischi amô figl, uossa cha essans vegls avains pü chi bsögn da qualchün chi 'ns soria e' ns renda la vita main trista, nus nun 't laschains pü partir!

Ma Gudench soriand als dschaiva: vus savais bain cha uossa m' ais que impossibel da renunzcher alla vita militara, siand granda probabilited cha in pochs anns possa obtgnair ün grado fich avantagius, e allura podais esser sgürs cha tuorn tar vus e passarons insemel dis d' incomparabla leidezza è felicited!

Tü turnarost cur cha sarons … … tuots trais aint a St. Gian al respondet ün di Nina fich gritta, sfruntô, bisnarum, nosch mattun, na tü nun partast pü, eau' t dun charta e sagè, varguogna, vituperi da tieu fat da vulair pü bain a ün schnatt, sdratsch mondura da „Curunel“ chi a tieu bap, a ta mamma e a ta Nina, eau saverò bain t' impedir da partir!

Nina tü est üna terribla e am fest quasi temma, dschet Gudench strandschand sieu maun, ma eir ans fest vairamaing paina in ans tschantschand … uschè, è sco solaiva fer ogni damaun el get sün lur lobgia, inua el durante circa ün' ura s' instruiva cun cudeschs ch' el avaiva porto da Paris, e chi' ls püss trataivan da l' arte della guerra!

Breva ma Nina, dschet duonna Chatrina cur cha Gudench füt partieu, tü hest fich bain fat dal fer üna brava parlata, e tuots trais stovains fer noss possibel da l' impedir da partir, ma dins que cha tü quintast fer per ch' el nun parta, dins?

Que cha quint fer! dschet Nina soriand, ella so bain duonna patruna cha grazch' al Tschel, il Segner am ho schafida e fatta cha vez uschè dalöntsch, e in bgerras chosas pü dalöntsch cu bgers oters, e per conseguenza … sè eir que chi ais da fer cha Gudench nun parta pü, e que ais, cha' l fains marider.

Ed uossa surtuot ch' els nu' s masdan brich ne sich, in quaist affer, cha sgür be eau se mner a buna fin, eau m' incharg dal tschercher e' l fer gnir inamuro in qualche giuvna richa e breva, bain inclet chi saja vschina da Schlarina, ù almain vschina da Cumön, e sch' ella nun ais neir güst d' üna famiglia uschè nobla cu la nossa, schi per que nun guardaro