Pagina:Decurtins - Rätoromanische chrestomathie, XII.djvu/40

Da Wikisource.
10 Florin Camathias

320El qual las fumitgasas han lur habitaziun.
„E leu giufuns la casa ei dat in esch zuppau
Or en la vall profunda, che po survir per vau
En cass d’uiar’e prighel, ch’ins less dascus fugir,
Mitschar da la bloccada el liber pli segir.

325Denton en cass de prighel, sch’igl inimitg rumpess
En casa tras miraglias, la tuor aunc resistess:
Ni flommas ni zacussas fan tema al balfrid,
Che porsch’en si’ altezia refugi e salit.
Sin scala lenn movibla, che tonscha dal palas
330Dado sitier l’intrada spuretga tier il plaz
Digl ault balcun de porta, ils umens defensurs
Van en la tuor pli gronda battend culs successurs
Da surengiu cun armas, che fan dado sterment,
Cun crappa, buoras grossas e cul cuntegn buglent,
335Derschius dal priel sin fueina agl inimitg sil tgau,
Che less cavar sutora ils mirs e far in vau,
Ne tras la porta pintga en casa seschlihar,
Ne better fiug sin lautga per quella arsentar.“—

Mo oz ei gevia grassa e prighel zun negin —
340Pinada ei la meisa en sala cun tgamin
Pil giuncher cun la spusa e tuts ils envidai,
Che ein tier la familia sil munt gia arrivai.
Da duas varts fenestras lain penetrar il clar,
Ch’ins po la sala nova mirar e contemplar;
345Rodunda ei lur fuorma sisum en stil roman,
Cun ina colonnetta amiez parada fan.
Entuorn la meisa ruver ein supias cun pusal,
Tagliadas ein figuras lien cun art special.
Las preits ein tabligiadas e suenter vi il baun
350De seser giu envida vitier sin mintga maun.
Il vegl plantschiu de schiember serasa sur ils tgaus,
Cun guottas ord la fravgia el ei egl ault fermaus.
Sin ina vart fermadas ins vesa vid ils crutschs
Las armas e la corna de tschierfs e de camutschs.
355Spel puffet sin clavella pendius ei gl’instrument,
La gronda biala harfa, che dat compognament
Cun sias harmonias al vierv de trubadurs,