Che contan d’aventuras, d’uiaras ed amurs.
Vieifer egl encarden ei il cundrez el mir, 360Che fa ord quella stanza il freid unviern fugir:
Sin ina platta lada il sec scanatsch de stgein
Fa ir las cauldas flomas egl ault allegramein.
El lartg ravugl sisura retscheiva il tgamin
Il fem, che penetrescha per via de fulin. 365Il giuven Zievi Liver, dil Vali possessur,
Vegn presentaus en sala al barunet signur.
El va cun Floribella la feglia dil casti,
Ad el gia empermessa, che porta siu ani,
E vegn cun el beingleiti en sia biala cuort, 370Da vegl enneu tut libra da tut signur enguord.
Il mat de buna stampa, vestgius de catschadur
En teilas della tiara, va loschs sco in signur.
Siu bab ei morts ord casa; il fegl igl onn vergau
In di de primavera ha ses fumegls rimnau, 375Ei ius sil crest sur casa ed ha la spada tratg
Alzond gl’itschal en l’aria, quei temps flurent de Matg,
Schmanond treis ga si’ arma, el ha egl ault clamau:
„Jeu quella cuort retscheivel da Diu e dal sogn sulegl.“
Ed ussa Floribella po dar ad el cussegl, 380 E po restar de niebel sco autras de siu pèr,
Ed en igl jert dil Vali plantar in bi roser.
Al giuncher Risch il Zievi raquenta dals babuns,
Che mavan giu dal Vali cun lontschas e spaduns
Tier Fridric Barbarossa, sco valerus schuldaus 385Tier numerusas lutgas encunter ils marcaus
Leu giu en Lombardia per sponder lur bien saung
Per quella barba cotschna, ch’a conquistau Milaun.
Il Lanzelet compara, il legher trubadur,
E fiera silla harfa egliadas ded ardur. 390El ha aunc melodias dil crest Razen el tgau
E la schlettada fatga novs mieds ha leventau.
Plirs onns ei staus il giuven tiel cont de Rapperswil;
El ha empriu de batter ed enqual art util.
En tut la vischinonza el ei enconoschents 395Tier giuvens e dunschalas e mussa bials talents
