Pagina:Goldoni - Opere complete, Venezia 1910, IX.djvu/451

Da Wikisource.
Jump to navigation Jump to search

IL CONTRATTEMPO 437


vedova dove che l’è allozà, la gh’ha della stima de lu, e credo anca dell’amor, e so che la lo sposaria volentiera, ma la vorria che l’avesse qualche ombra d’impiego, qualche principio de fondamento per stabilirse in Bologna: caro sior Pantalon, con poco la lo pol aiutar.

Pantalone. Ma come sarala co sior Lelio? El dise che el l’ha ferìo. La giustizia lo cerca.

Brighella. Niente, signor, avemo giustà ogni cossa. Ho messo de mezzo el mio padron, che la sa che cavalier d’impegno che l’è. Sior Lelio se contenta de una piccola sodisfazion, e per la Giustizia la cossa l’è accomodata.

Pantalone. Cossa voleu che fazza per elo?

Brighella. La lo impiega in qualcossa. L’è un omo pien d’abilità.

Pantalone. De conti ho paura che nol ghe ne sappia.

Brighella. L’è capace de tutto, ghe digo, e po a sior Pantalon no ghe manca el modo. O in t’una casa, o in t’un’altra, col vol, el lo impiegherà. In verità, sior, se la fa sta opera de pietà, el cielo la ricompenserà con usura.

Pantalone. No so cossa dir. Fèmelo vegnir qua.

Brighella. Subito el vien, cara ela, ghe lo raccomando.

Pantalone. Che el me parla schietto, che el me diga la verità, e vederò de assisterlo, de impiegarlo.

Brighella. No la se dubita, che no l’è capace de dir busie; anzi el so mal maggior l’è quello de dir troppo la verità.

Pantalone. Certo, che co se xe chiamai a parlar, bisogna dir la verità più tosto che la busia; ma la prudenza insegna a taser, quando la verità ne pol far del mal.

Brighella. La ghe daga anche ela qualchedun de sti boni arrecordi.

Pantalone. No ve dubitè; lo tratterò come se el fusse un mio fio.

Brighella. Sielo benedetto, el me consola. Vado a consolarlo anca lu, e lo mando qua. (E poi subito corro da siora Beatrice, a remediar, se posso, quell’altro mal). (da sè) Mi per natura son inclinà a far del ben, e a chi m’ha fatto del ben a mi, ghe daria per gratitudine anca el sangue delle mie vene. (parte)