Pagina:Goldoni - Opere complete, Venezia 1914, XVIII.djvu/406

390

ATTO PRIMO

Nicoletto. De diana! gnanca se fusse...

Barbara. Manco chiaccole, che son stufa. In tanta malora^a, me porteu sto ferro? (alla scena, con collera)

SCENA III.

Margarita e detti.

Margarita. Son qua, son qua. Cara ela, nol giera caldo abbastanza.

Barbara. Gnente, no i pensa gnente a sto mondo. I crede che la roba me vegna drento per i balconi, e sì el gh’ha i anni della discrezion. Disdott’anni sul cesto^b el gh’ha, e nol pensa a gnente. (stirando)

Margarita. (Cossa xe sta?) (piano a Nicoletto)

Nicoletto. Gnente, perchè gh’ho domanda una camisa, la va in collera in sta maniera. (a Margarita)

Margarita. (No salo^c? La xe cussì la parona, la va in collera facilmente; ma la xe de buon cuor, la ghe la darà). (a Nicoletto)

Barbara. Quanto xe che no andè da vostro sior santolo^d? (stirando)

Nicoletto. No so, no m’arecordo.

Barbara. Andeghe, e raccomandeve. L’ha promesso de logarve^e, de metterve in t’un mezzà^f; ma co no se ghe va, no i se lo recorda. (stirando)

Nicoletto. Vorla che vaga co sta camisa sporca?

Barbara. Aspettè, adesso ve metterè i manegotti.

Nicoletto. Sia malignazo^g! xeli fini almanco?

Barbara. Me par de sì. Ho desfatto quattro camise de renso del poveretto vostro sior pare, e v’ho cava tre camisette e tre pera¹ de manegotti, che no i gh’ha una macula^h al mondo.

1. Espressione che spiega l’impazienza.
2. Sul di dietro.
3. Non lo sa?
4. Patrino.
5. Di impiegarvi.
6. In uno studio.
7. Maniera di quasi maledire per collera, ma onestamente.
8. Che non avevano alcun difetto.

1. Tre paia.