 |
Questa pagina è stata trascritta, formattata e riletta. | |
| LE BARUFFE CHIOZZOTTE | 89 |
Libera. Oh! lustrissimo, no. Gh’aveva una flussion. So varìa.
Isidoro. Cussì presto?
Libera. Da un momento all’altro.
Isidoro. Anca sì, che gieri deventada sorda per no dir...
Fortunato. Tissimo. (ad Isidoro)
Isidoro. Ho gusto che sia qua anca compare burataoraa. Son qua per dirve se marideressi Checchina.
Libera. Magari, lustrissimo! Me la destrigheria volentierab.
Fortunato. Mi, utissimo, gh’ho pomesso cento ucatic.
Libera. E altri cinquanta ghe li averemo sunaid.
Isidoro. E mi ghe farò aver una grazia de altri cinquanta.
Libera. Sielo benedetto! Gh’alo qualche partio?
Isidoro. Vardè: ve piaselo quel partio? (accenna Toffolo)
Fortunato. Toffao? Toffao? Catta bauffe, catta bauffee.
Toffolo. Mi no dago impazzo a nissun, co i me lassa stare...
Libera. Con un puo’ de battelo, come l’alo da mantegnire?
Toffolo. No metteroggio suso peota, no metteroggio?
Libera. E dove la menerastu, se no ti gh’ha nè tetto, nè caf?
Fortunato. La ustu menare i battelo la novizza a dormire?
Toffolo. Ve podè tegnire i cento ducati, ve podè tegnire, e farme le spese a mi e a mia muggiere.
Isidoro. Sì ben; nol dise mal, el gh’ha più giudizio che no credeva. Podè per qualche tempo tegnirlo in casa.
Libera. Mo per quanto, lustrissimo?
Isidoro. A conto de sti cento ducati, per quanto voressistu che i te fasse le spese?
Toffolo. No so; almanco siè anni.
Fortunato. Puffeta! puffeta! Siè anni? Puffeta!
Isidoro. Ti voressi ben spender poco.
Toffolo. Che la fazza ela, lustrissimo.
Isidoro. Via, per un anno ve comoda? (a Libera)
Libera. Cossa diseu, paron? (a Fortunato)
