Pagina:Goldoni - Opere complete, Venezia 1922, XXI.djvu/447

Da Wikisource.
Jump to navigation Jump to search


Tonina. Ave fatto un gran disnar ancuo? se sente dei gran odori.

Oste. Odori e saori. Cossa disela ? (ridendo)

Tonina. Mi ve digo che sto fumo per casa no me piase gnente.

Oste. Bisogna ch’el so camin fazza fumo.

Tonina. Se r ho fatto scoar che no xe quattro zorni.

Gasparo. A monte sti pettegolezzi, (a Tonino) Cossa me comanda sior paron Menego ?

Oste. Prima de tutto, ghe torno a dir, me preme de saver se i mi paroni, se i mi avventori xe contenti de mi. Gh’ ha piasso, xela resta contenta stamattina ?

Gasparo. De cossa?

Oste. De cossa ? De tutto ; del disnar che gh’ ho fatto.

Tonina. Disnar ?

Gasparo. Sior paron, vu me tolè in fallo.

Oste. No xela ella sior Gasparo sanser ?

Gasparo. Son mi seguro.

Tonina. (Sentimo mo !) (da sè)

Oste. E pò cossa serve, ho Servio in sta casa, e s’ ha magna in sto tinello.

Tonina. Quando ? (con ansietà)

Oste. Ancuo.

Tonina. Ah ! questo xe l’odor che sentiva, (a Gasparo, con sdegno)

Gasparo. Mi ve digo, sior, che no so gnente, e che me mara- veggio de vu.

Oste. E mi ghe digo, patron, che me maraveggio de ella, che ho parecchia qua in sta casa per sette persone...

Tonina. Sette persone ? (all’ Oste)

Oste. Siora sì, sette persone, a un zecchin per testa.

Tonina. Una bagatella ? ghe giera donne? (con furia all’Oste)

Gasparo. Quieteve, perchè quello xe un pezzo de matto, (a Tonina)

Tonina. Ghe giera donne ? (con più furia all’ Oste)

Oste. Mi no so chi ghe fusse, ma i m’ ha dito i mi omeni che ghe giera quattro omeni e tre donne.

Tonina. Tre donne ! (contro Gasparo fieramente) L’ ho dito ; l’ ho scoverto : sior Bernardin ah ! El sior diavolo che ve porta.