Pagina:Goldoni - Opere complete, Venezia 1922, XXI.djvu/448

Da Wikisource.
Jump to navigation Jump to search
442 ATTO SECONDO

Gasparo. Tasè una volta, in tanta malora. (a Tonina) Sior osto, mi son un galantomo.

Oste. E mi son un galantomo anca mi.

Tonina. Cossa serve che ve fe nasar?1 Paghelo. (a Gasparo)

Gasparo. Tasè. (a Tonina)

Tonina. Aveu magnà? Paghelo. (a Gasparo)

Gasparo. Ma tasi, che te casca la testa. (a Tonina) Disè donca che ave parecchià qua sto disnar? (all’Oste)

Oste. Sior sì, lo digo, e lo sostegno.

Tonina. No se salo?

Gasparo. (Guarda Tonina bruscamente, poi si volta all’Oste) E avè parecchià per sette persone, a un zecchin a testa?

Tonina. Sior Bernardin, sior Bernardin.

Oste. Cussi semo restai d’accordo.

Gasparo. Con chi? Chi v’ha ordenà da disnar?

Oste. So sior fradelo.

Gasparo. Compare, vu v’inganè, perchè mi no gh’ho fradeli.

Tonina. Tutte finte, tutti rezziri2. Sior sì, per sconderse l’ha fatto passar qualchedun per so fradelo. (all’Oste)

Gasparo. Se poi sentir de pezo! Infamar so mario! (a Tonina)

Oste. Sior Gasparo, no so cossa dir, me despiase... Se la m’avesse dito che no la voleva che so muggier savesse gnente...

Gasparo. Mi no voleva!...

Tonina. Sior sì, sior sì, nol voleva che mi lo savesse. Ma lo so, l’ho scoverto a so marzo despetto.

Gasparo. Orsù, son stuffo de soffrir ste insolenze. (a Tonina) E a vu, sior, ve digo che no so gnente, che no v’ho da dar gnente, e che andè a bon viazo3 (all’Oste)

Oste. Me maraveggio de ela. Se no la me vol pagar, ghe penserò mi a farme pagar, ma intanto la me daga la mia roba, patron.

Gasparo. Che roba?

Oste. Le mie possae, i mi piatti, la mia biancheria.

  1. Farse nasar, farsi scorgere: vol. XII, 145, n. 2 e XVIII, 362, n. b.
  2. Così il testo: più comunemente razziri, raggiri.
  3. In santa pace.