Pagina:Pinochio.djvu/55

Da Wikisource.

Co sta seconda boujia el nas l a seguita a se slonga.
- Se te s as pardudes ca inze l bosco - r a dito ra Fatazina - ’son a vede agnoche ’se,e res ciaton de seguro: parceche duto chel che se perde inze sto bosco, se l ciata senpre.
- Ah! ades me sovien - l i a respondu el buratin, e cosci el s a pandu - ra monedes no s ei pardudes, ma zenza m inacorse es ei jotides ’so canche beee ra vostra medejina.
Co sta terza boujia, el nas de Pinochio el s a tanto slonga che chel por pizo el no n a pi podu se volta aneo. Se l se voltaa da una el petaa el nas inze l lieto e su par ra lastres de ra funestra, se l se voltaa da r outra el lo petaa su par el muro o inze par ra porta de camera, se 1 tiraa su nafre ra testa el ris-ciaa de i lo para inze un ocio a ra Fatazina.
Era ra l vardaa e ra riduzaa.
- Parce rideo? - l i a damanda el buratin, duto frastorna e susta a vede chel nas che l se slongaa manman.
- Rido par ra boujia che t as dito.
- Cemodo fejeo a sae che ei dito na boujia?
- Ra boujies, pizo, se l conosce alolo, parceche in e de doa sortes: l e cheres co ra janba curtes, e cheres col nas longo: ra toa l e una de cheres col nas longo.
Pinochio el no saea pi agno se sconde da ra vargogna; l a proa a scanpa fora de camera, ma l no n e sta bon. El so nas l ea deenta cosci longo che l no passaa gnanche pi fora par porta.
55


55