Compendio biblico in lingua genovese/Como lo nostro segnor Dee comandà a Noe che ello feisse l'archa e comenssà la segonda hetae
Questo testo è completo. |
◄ | Chì se contèn la generacion le quai fon VIIII e fo la prima hetae | De la generaciom de Noe | ► |
Como lo nostro segnor Dee comandà a Noe che ello feisse l'archa e comenssà la segonda hetae
E lantora Noe misse man a fá l'archa, e quando a fo liverá, segondo che Dee ge ave' comandao, ello se ge recogiè dentro con soa mogié e con soi figij e con soe nore e con tuti li animai. E quande ello ge fo dentro e bem serao, lo nostro segnor Dee arvì tute le fontane de abiso e fe che o non sesà de jhove quaranta di e quaranta nocte, si che tuto lo mondo fo pin de aigoa, e cresè in tale[sic] modo la aigoa che ella montà sorva tuto lo mondo quaranta goa, e cossì sorva tute le montagne. E l'archa andava sorve l'aigoa como una nave, e, quando la aigoa sesà, l'archa romaze in Ermenia[*] sorve una montagna chi era pu ata cha tute le atre. E quando Noe vi che l'archa era staita ferma per monti iorni, ello si arvì una de le fenestre, e ello goardà e vi che ello era in logo ato, e vi che la terra era anchora coverta d'aigoa. E si mandà um crovo de fora chi trovà tuta la terra coverta de carne, de la qua o ne mangià tanta che o non curava de torná a Noe. E quando Noe vi che lo crovo non tornava, l'undeman si ge mandà una coronba, la qua tornà a ello a l'ora de vespo e aduxe in bocha una ramma de oriva verde. E, quando Noe la vi, si regracià Dee de quelle maravegie. E poa lassà Noe passá trei di. E poa o tornà anchora a mandá la coronba, e tornà de prezente, e ella vorava in nato[sic] e non vosse intrá dentro, a dá a intende a Noe che a trovava asai da mangiare[sic]. E lantora Noe pensà che o poreiva ben insí de dentre l'archa, e l'umdeman e l'insì fora de l'archa e cassà fora tuti li animai e tuti li oxelli chi eram in l'archa, e ello incomensà [...] con li soi figij, per modo che ello inpì tuto lo mondo de gente, unde, per questa mainera, lo nostro segnor Dee si recoverà lo linagio de l'umana natura chi era perdua. E chi se incomensa la segona[sic] etae.