Historias dil munt sogn Gieri/13

Da Wikisource.
Jump to navigation Jump to search
Il sogn cristagl

../12 ../14 IncludiIntestazione 1 ottobre 2015 25% Da definire

12 14

Il sogn cristagl.

Giusep d' Arimathia possedeva
In admirabel bi cristagl mulau;
La cuppa cara transparenta steva
Sin in bi pei ord il cristagl tagliau,
1770 En quei vaschi il Segner tier la tscheina,
Ha dau il sacrament d' amur compleina.
La cuppa benedida ei lu stada
Portada d' aunghels tier il cor aviert
Dil Segner culla costa transforada
1775 Ed ha il saung, ch' ei spons per nus, retschiert.
Quei sogn vaschi ha forzas graziusas
E fa las olmas star victoriusas.
Sche in malsaun fidond sil calisch mira,
Quell' jamna Dieus pertgir' el dalla mort.
1780 E tgi ch' en ses combats tier quel suspira,
Sa mai curdar en perniziusa sort.
Mintg' onn il Venderdis sogn renovada
Vegn sia forza tras la sontga Blada:
Columba clara giu da tschiel sesbassa
1785 E tschenta ina hostia el vaschi,
Ch' ils aunghels baul en terlischonta rassa,
E baul purschalas portan cun tschupi.
Sur la carstgaunadat il Gral terlischa
E sa las grazias dar, ch' il cor giavischa.
1790 Ei dat noblezia buc sil mund pli gronda,
Che quella de survir al sogn cristagl;
Mo sacrifecis quei survetsch domonda,
Vertit e sforz, ch' ein buca mo termagl:
El vul fideivladat, perseveronza
1795 E cun la castiadat, humilitonza.
Igl um de tuts il pli humiliteivel
Dils cavaliers il retg po daventar,
Ils quals quei scazzi glorius custeivel
Per la carstgaunadat ston pertgirar.
1800 Quels cavaliers spirituals s' unfreschan
Pigl ideal divin, ch' els venereschan.
Il Titurel, in fegl dil retg de Frontscha,
Ei staus virtuus, vengonz de quell' honur;
Per sontga crusch el ha smanau la lontscha
1805 E fatg al Gral in tempel plein splendur:
Sil Montsalvaz, si ault e lunsch ell' aria
Stat la fortezia sontga, solitaria.
Da la levada encunter la rendida
Ils aunghels han in sogn cristagl portau,
1810 En la baselgia sin il quolm finida,
La sontgadat als cavaliers surdau:
Amiez il tempel ault stat il misteri,
Ils cavaliers ein leu pil ministeri.
Entuorn baselgia bials palaz en retscha
1815 Ad els surveschan per habitaziun:
Cu il solegl levont las tuors leu betscha,
Viv terlischar levent' admiraziun:
La pasch de Diu sil quolm ei secasada
E dal terrester mai vegn disturbada.
1820 Pertgei tschinclaus ei quei liug sogn sin tiara
Da spessa selva pliras uras lunsch:
Mo tgi che suenter il cristagl empiara,
Clamaus dal Segner, leu arriva tgunsch;
Ed arrivond il tempel el admira,
1825 Che stat schi maiestus sur la planira.
Il tempel tschien tschuncheismas mesirava
Per miez tras il bagetg solid rodund;
E chors siatonta dus ins admirava,
Plazzai entuorn sin il rudi profund.
1830 Suls trentasis clutgers la tuor pli gronda
S' alzav' amiez cun fatscha terlischonta.
Sil spitg in evla gronda mervegliusa
Mirava suls tetgals, tuts sularai;
Clutgers mussavan crappa preziusa
1835 E culla crusch tuts eran coronai;
Sut il raviul amiez el sanctuari
Er il cristagl el bi reliquiari.
Bia tschentaners quei tempel splendurava
Als pievels pietus digl occident;
1840 Svanid' ei uss la tuor, cun porta, sava,
Portada cun il Gral egl orient:
Ils pievels emblidavan lur clamada,
E biars han pers tiel paradis l' intrada.
Mo tgi che salv' il niebel desideri,
1845 Aunc ussa po il sogn cristagl anflar,
E quel ch' adura siu profund misteri,
Perpetna giuventetgna po salvar:
Il sogn cristagl da tschiel tier el s' enclina
Cul prezius regal d' amur divina.
1850 Il Lanzelet prepara siu instrument sonor,
Che fa tras Terpsichora flurir il bien humor.
Castials el enconuscha en Rezia numerus,
Las portas ein aviartas al trubadur famus.
Tier el uss vegn la roda de far sclarir talents,
1855 Ed el cun siu trianghel gartegia bials accents.