 |
Questa pagina è stata trascritta ma deve essere formattata o controllata. | |
| 638 | Märchen |
vies cavagl.“ „Esser eis ti in fin coga!“ di il padrin; „mo questa notg stos ti prender ora sut il tgil de mei e mia dunna il batlini e lu aunc ord det alla dunna igl ani.“
„Sche ti sas far quei, eis ti veramein in fin lader.“ „Quei vi jeu schon far“ rispund' il figliol. El va a casa e fa in terment umm de strom e lez port' el entuorn mesa notg d' ina scala si, si per las finiastras dil padrin. Il padrin vesa quei e di si per la dunna: „Uss ei il cugliun cheu, a quel vi jeu dar batlini.“ El leva spert e dat in terment stausch a quei umm strom, se cartent de stuschar il figliol della scala giu. Quei umm strom ei ruclaus ed jus in toc della via vi. Denton ei il figliol se postaus si sper 'gl esch casa; pertgei el sminava, che siu padrin vessi scrupel, co ei massi cun il figliol, e vegnessi o, per mirar, nua ch' el seigi. Richtig, il padrin di si per la dunna vonzei: „Jeu stoi tonaton ira giu per mirar, tgei il figliol fa, sch' el ei aunc en vita, ne tgei.“ El leva e va giuado. Denton vegn il figliol en stiva, fa la vusch dil padrin e di si per la dunna: „Ti podesses aunc dar, avon ch' jeu vom, il batlini ed igl ani. Quei figliol ei ton in cugliun, ch' ins sa se fidar nuot ded el.“ La dunna, se cartent, ch' ei seigi siu umm, dat neu il batlini ed igl ani. Il figliol va giu ed il padrin vegn quort temps suenter en combra. La dunna damonda, tgei siu figliol fetschi. Igl umm di, el hagi viu nuot. Sin quei di la dunna: „Igl ani ed il batlini vens ti bein haver mess en truca, ch' el possi buca tier.“ Mo' gl umm voleva saver de quei nuot e per ussa ein il padrin sia dunna se fatgs en, ch' ei seigien cuglienai. L' autra damaun vegn il figlol cun igl ani ed il batlini ed il padrin ha stoviu confessar, ch' el hagi empriu il mistregn de lader en uorden.
107. Il tup fegl.
Ei era ina gada ina dunna, che haveva mo in fegl. Quei fegl ha la dunna termess a marcau per cumprar guilas de cuser. De vignir de marcau ei il buob suatius ad in umm, che mava cun in blach fein, ed el ha priu e catschau las guilas en quei blach, per buca piarder ellas aschi tgiunsch. Mo cura ch' els ein vegni a casa, anflav' il mat buca pli las guilas el fein ed el ha stoviu ira a casa sia senza las guilas. Tut trests ha el raquintau alla mumma, co ei seigi ju, e quella ha detg: „ti pos esser in toc tup, catschavas las guilas en la capiala, sche havesses ti uss' ellas.“ L' autra gada ha la mumma termess el a marcau, per cumprar in tarden. Il mat se regordava fetg bein tgei, che la mumma haveva detg, e suenter haver cumprau il tarden, ha el catschau quel en la capialla ed ei vegnius aschia cun quel a casa. Quella gada cartev' el de ver fatg endretg alla mumma. Mo la mumma ha sevilau e detg: „Schniap, che ti eis, in tarden catsch' ins
