Pagina:Decurtins - Rätoromanische chrestomathie, VIII.djvu/558

Da Wikisource.
Vai alla navigazione Vai alla ricerca
548 Andrea Vital

d’Engiadina, chi ha cumanzà sia cuorsa terrastra als 1 Schner 1858, dunque cuort temp dopo la comparsa dell’ortografia da Pallioppi, ha applichà da principi innan las maximas da medem. La redacziun po perque asserir con plain dret: 1

„Scha vulessans auncha far menziun da qualche früts, cha ’l Fögl ho porto, u da qualche merits, ch’el ho, schi crajains, ch’el hegia na solum sport occasiun a bgers Engiadinais d’exprimer lur differentas opiniuns supra affers pü importants, taunt patriotics cu locals, dimperse ch’el hegia eir introdot in Engiadin’ota üna megldra ortografia pü unifuorma, fundeda sün l’ortografia ed ortoëpia da Pallioppi, e rendieu quella, sainz’esser minuziusamaing sclev da ditt’excellent’ouvretta, pü generela.“

Tuottüna non avaiva il Fögl plü bod mai rendü attent seis lectuors sün l’ouvra da Pallioppi, saja per la recomandar, o saja almain per dir, cha la redacziun scriva tenor las maximas da medemma. Pür l’an 1860 chattain qualchosa in merit nel Fögl, nempe il seguaint artichel della redacziun. 2

„Puncto ortografia romauntscha. Cognitamaing non regnaiva pü bod üngüna ortografia romauntscha baseda sün principis güsts o sün reglas bain radschunedas e fundedas. Ogni ün scrivaiva a sieu möd e chaprizzi.

Svess nels vegls cudeschs romauntschs ais il möd da scriver in püss reguards different. Schi, perfin nellas scrittüras d’homens, chi vestivan las prümas caricas del pajais e chi discurrivan e scrivaivan uschiglö fich bain romauntsch, ais diversa l’ortografia. Ün chatta reramaing duos, chi scrivan nell’istessa maniera. Quaunt pü granda eira la confusiun in proposit nel restant della populaziun! — Desiderabla eira dimena üna guida e regla in merit. — E bain, uossa avains bain radschunos e fundos principis d’ortografia nell’ovretta del Sigr. Landam. Z. Pallioppi, intituleda: „Ortografia del idiom romauntsch d’Engiadin’ota.“ Scha qualchüns vöglian nonostante scriver diversamaing, critichand la ditta ovretta, schi ch’els fatschan cognuoscher lur principis differents ed addüan eir radschuns e provas cleras, uschigliö po ün dir eir quia: Criticher so immincha nar! — In ogni cas essans nus del parair, cha saja megl d’avair üna regla co üngüna; ed infina cha nun averons ün’otra guida nell’ortografia preferabla a quella ch’avains uossa, schi cussgliains a tuots quels, chi scrivan romauntsch, postüt als magisters, chi muossan romauntsch nellas scoulas, d’introdür ed adopter ils principis d’ortografia declaros nella preciteda

  1. In ün artichel intitulà: Cuorta descripziun della vita del Fögl d’ Engiadina, An 1866 Nr. 3.
  2. Puncto ortografia romauntscha, Fögl d’Engiadina, An 1860 Nr. 48