 |
Questa pagina è stata trascritta, formattata e riletta. | |
| LA BANCAROTTA | 397 |
Truffaldino. Deme la me chiave.
Pantalone. Te darò un fracco de legnae, se no ti va via.
Truffaldino. La me costa un ducato.
Pantalone. Chi elo quel favro che te l’ha fatta?
Truffaldino. L’era un galantomo, che le faceva per far servizio ai zoveni de bottega.
Pantalone. Voggio saver chi el xe. Dove stalo de bottega?
Truffaldino. Nol gh’ha bottega, el negozia in casa.
Pantalone. Ma dove?
Truffaldino. All’altro mondo.
Pantalone. Xelo morto?
Truffaldino. Sior sì; a Napoli, per benemerito della so bella virtù, i gh’ha fatto l’onor de impiccarlo.
Pantalone. I te farà anca a ti lo stesso onor, se ti seguiterà sta vita.
Truffaldino. Per cossa?
Pantalone. Perchè ti è un ladro.
Truffaldino. Tutti i ladri se impiccheli?
Pantalone. Certo.
Truffaldino. Caro sior Pantalon, adesso che so sta cossa, no gh’è dubbio che toga mai più niente a nissun. Me despiase d’averlo fatto e ve domando perdon. Ve ringrazio che m’ave fatto la carità de avvisarme, e per gratitudine ve vol dar anca mi un avvertimento da amigo. Vardeve ben e penseghe ben, perchè se mi ho robà a mi patroni, anca vu ave ingannà i marcanti che v’ha fidà la so roba, e credemelo, sior Pantalon, che anca a questo se ghe dise robar. (parte)
SCENA II.
Pantalone, poi Margone.
Pantalone. Tocco de desgrazià!... Ma! no so cossa dir. El m’ha fatto vegnir i suori. Manco mal che no gh’è nissun.
Marcone. Oh, signor Pantalone, la riverisco.
Pantalone. Compare Marcon, bona sera fioria.
Marcone. Eccomi qui a ricevere le vostre grazie.
