Poesias (Camathias)/6

Da Wikisource.
Jump to navigation Jump to search
Lavur cummina

../5 ../7 IncludiIntestazione 1 ottobre 2015 25% Da definire

5 7

Lavur cummina.

(Nach Igl Ischi, S. 49, 1911.)

Ei tucca il zenn grond,
Ed oz ei tonatont
Ni fiasta ni firau?
Vischins san tgei quei munta:
5 Lavur cummina splunta,
— Sco fatg ed usitau.
Entuorn sogn Gion la stad,
Quei sa cheu mintga mat,
Igl ei ded ir a vias:
10 E mintga vischinadi,
Tral funds ed el selvadi,
Dei mantener las sias.
Cheu vegn gia il gierau
Sil plaz sco gliei fixau
15 E spetga buns luvrers,
Ils purs e mistergners:
Da mintga fiug in dell
Duess cheu comparer
E far il siu duer
20 Cun spat, zappun, badell.
Mo tier lavur cummina
Ei fa ca grad furtina —
Buc in ei cheu che isa,
Scadin luvrer bein stgisa:
25 Il vegl ed il mattatsch
E mintga fleivel bratsch.
Uss sin cadruvi vegnan
Tuts quels che l' arma tegnan
Sin maun e sin schui.
30 Perfin enquala matta
Culs umens cheu secatta
Per far quei luverdi
Bien uorden, nu' ch' ei maunca,
Sils vaus entuorn vischnaunca,
35 Ch' ins sappi ir cun carr
La stad per raccoltar.
Plaunsiu secresch' il triep,
Ei vegnan senza tschiep,
En mongias alvas era,
40 Il tschiel fa biala tschera;
Las femnas dad in maun,
Ein aunc empau schenadas
E teman las strihadas
Dils ménders sin il baun.
45 Il cau cun barba grischa,
Cul tgau blut, che terlischa,
Dat o las ordras sias,
Co reparar las vias.
Sco general el stat
50 Avon in ferm combat;
La truppa comparida
Sil plaz cun tonta prescha,
Pinada tier la frida,
El bein examinescha;
55 Il tgau el era scrola
Vesent l' armada stoda,
Ils nums el scriv' e noda
Sil cedel de controla.
Ed il cauvitg commonda
60 Cun tact e peisa gronda:
„Vischins, teni maun tier,
Luvrei empau lingier,
Dei buna rugalada
Als vaus de funs e prada
65 Sco gl' uorden quei prescriva:
Sin via maluliva
Sederscha tgunsch la carga. —
Luvrers, mussei premura,
E stei entochen l' ura,
70 Dabot! Il temps spert varga!“
Uss van las divisiuns
En tuttas direcziuns,
In triep per mintga via,
En legra compagnia!
75 Tgi va giu els Tuleus,
Tgi cava si Spineus;
Quels van si Runcalinas
E tschels sin Clius e Spinas.
Las vias ein lavadas
80 E tscheu e leu sbuadas,
E crapp' eis ei en peis,
Ruclada giu dal teiss,
Lavur cheu sepresenta,
Zatgei pertut daventa,
85 Per il beinstar cummin
Sedrov' empau scadin . . . .
Denton il temps ruchegia,
E cun lavur e bregia,
Cun enqual narradat
90 E denteren risadas,
Las vias ein cuntschadas
Puspei per ina stad.