Poesias (Carnot)/8
 |
Questo testo è incompleto. | |
| ◄ | 7 | 9 | ► |
Il giuven herox.
(Nach Calender, S. 38, 1917.)
El ei spartius. — En las annalas
Negliu stat in maletg digl um.
Sur d' el vegn mai plidau en salas,
Il scalper scalpra mai siu num.
5 L' uiara sa dal grond victur
Sa nuot dal giuven catschadur.
Jeu sai dad el. Sil pign senteri
Or el Tirol sun sepostaus.
Il saung dil cor a mi stess eri,
10 Vegness Sep Thöni emblidaus.
Quei num stat screts sin pintga crusch,
Jeu clom' el oz cun ferma vusch.
Dus onns eis ei: en paisch profunda
La casa stat en ers madirs,
15 Mellera cotschna sin la spunda,
Las neglas penden giu dals mirs.
Bab, mumma, soras han de far,
Il Segner lai bein raccoltar.
Ei siara notg, il frar arriva
20 Si dal marcau tut suentaus
El cloma tier ils cars en stiva:
„Fagei per senn: assassinaus
Franz Ferdinand, nies venerau —
Scrocs digl uffiern han el mazzau!“
25 „Ei bucca ver! Vas en fanzegna?“
Sep bragia: „Fuss jeu morts per el!“
Ils auters tremblan: „Tgei menzegna!“
— Las neglas sper il fenestrel,
Ei tremblan era sco de dir:
30 L' uiara! L' ura de suffrir!
Sep bragia. Na, pli cauldas larmas
Han ils treis orfans gnanc bargiu.
El tema buca saung ed armas,
El ha sut armas bein surviu.
35 „Franz Ferdinand! — Jeu catschadur
Less oz murir per ti' amur!“
En l' olma giuvna plein clarezia
Emprema gronda, ferm' amur!
Emprema spada de tristezia
40 El cor dil giuven catschadur!
Aschi sfraccau el mai bargess
Sch' en fossa sia spusa stess.
Las larmas schigian, zenns resunan:
Fideivla Austria, ferm, stai si!
45 Sche sper la Donau gretas tunan,
Pilver, el sogn Tirol aunc pli:
Ein tuts fideivels, valerus,
Il pli fideivels essan nus!
Sep Thöni marscha cullas roschas
50 Dils catschadurs imperials.
Sin tgau sgolatschan plemas loschas,
Ses égls terlischan sco cristals.
Solet in betsch tier il combat
Port' el sco mo la mumma dat.
55 Per crius combata sin las Carpathas
Sto' l betsch de mumma ditg cuzzar,
Per saung e neiv, per las granatas,
E sto si' olma pertgirar.
Sep sietta bein, mo mira mai
60 Cun égls crudeivels sils curdai.
Amiez 'gl uffiern cun égls migeivels,
Cun olma schubra el combat
Stat el sidretg sut pugns crudeivels,
Entochen ch' el ensemen dat.
65 El lazaret, sut jasters mirs,
Lunsch dal Tirol sto el suffrir.
„Per miu Tirol lasch' jeu encrescher,
Laschei turnar mei tier ils mes!
Leu ha il Segner mei schau nescher,
70 Sauns vegn jeu mo tiels Tiroles.
Car bab, ah, neu! — Hai jeu semiau?
Ti astgas buc, eis sez schuldau.“
In vegl schuldau, mirei! arriva,
El va cul fegl, ha bien quitau.
75 Ed omisdus en cara stiva
Disquoran dal grev temps passau.
Ed omisdus ston confessar:
„Nus lessen sils confins turnar!“
Con tes confins ein demaneivels,
80 Bien catschadur imperial!
Sesend von casa, alvs e fleivels,
Ti miras giu sin vitg e val.
Tiu car Tirol, plai el a ti?
Damaun poss ver el buca pli.
85 Co ei la stiva plein clarezia!
Niessegner sez ha visitau
El sacrament della carezia
Il giuven moribund schuldau.
El ei cuntents — e vus bargis?
90 Pli che Tirol val' il Parvis!
Dal mir terlischan bi las armas
Dil catschadur imperial.
El mira sin ses cars en larmas:
„Pertgei bargis? … — Quei fa mi mal —
95 Maria e miu aunghel car
Ein cheu — cun quels stoi viagiar!“
Cun quels eis el bein ius a casa
Il betsch de mumma aunc sil frunt. —
O paisch, da sia crusch serasa
100 Sur il Tirol e sur il mund!
Mo franc: il saung el cor rentass,
Sche jeu quei herox emblidass.