Poesie friulane/Morosèz e matèz/Il barcarùl
 |
Questo testo è completo. | |
Ercole Carletti - Poesie friulane (1920)
Il barcarùl
| ◄ | Morosèz e matèz - Di grinte | Morosèz e matèz - L'insiùm | ► |
Il barcarùl.
Chèst mio cui al è còme il barcarùl, ch’al mène
la barçhe de me vite a intopà, ogni cuàl trat,
in une sèçhe, o a sbati in un çuc, e che apène
passade la paùre, al mi tome a fà il mat.
Jò lu consèj, lu prèj, lu çhastìi, ’o fâs pròve
di çhòj’ la man. E pur, sul moment di schivà
un pericul, s’al alze dòme la vôs, no zòve,
mi pâr scuàsi ch’al véti resòn. Dal rèst, cui sa,
cui sa se la mé barçhe, a l’òre che il soréli
si bòne, cu’ la vèle tindude a i’ùltim flâd
di àjar, no véi pâs, sul mar lìs tan’ che un spiéli?
Ma il barcarùl, alòre, al sarà zà inneâd.