Prose e poesie bellunesi 2008/2
 |
Questo testo è da formattare. | |
| ◄ | 1 | 3 | ► |
EMILIO DA DEPPO (1946)
“Zenza Dio e zenza leie, litiganti da Domeie”.
Da senpre, tra la dente del Cadore era l usanza de dasse dei soranome a ogni paes, par menasse n giro e anche per evidenzià difeti e usanze stranbe. Par esenpio “i magnacarta da Piee”, i “cène da Loze” o i “mus da Sotecastèl”. Noi da Domeie i ne à senpre ciamà “ Zenza Dio e zenza leie, litiganti da Domeie” opur “chi passa Domeie e Vodo passa ogni logo”. L é n tin pesante, sta roba!
Par la frase “zenza Dio” no ei nformazion par dà credito a la storia; sei par esenpio che “turche da Valisela” era leà al fato che tel 1500, cuanche Venezia dovea finanzià le so navi per conbate i Turche, i avea domandà schei a dute le parochie, e Valisela no avea dato nìa, cuindi i é stade considerade “turche”.
Cuanche vardo la cesa de Domeie, granda e maestosa pi de chel che forse servìa par i abitanti che era, no la me par fata da dente che no avesse timor de Dio. Se calchidun savesse calcosa de pì, me piasarae risolve sta facenda, anche par redimesse. Nveze, par “zenza leie” avrae ciatà calcosa che se riferisse ai tempi de Tiziano e che podarae iutà a capì. La à scrita l inglese Gilbert, cuanche da alpinista l ienèa tra le nostre crode (1860/70), ma l é n fato vero.
Tel 1570 ereone sote i Veneziane e le tere era divideste n centurie. Una de cheste era Domeie, e l governator era n zerto Federico Soldano, fiol de Oderico Soldano che avea sposà Caterina, suor de Tiziano. Savon che i paes del Cadore, usade a laurà, i à senpre malvisto Piee, n cuanto “magnacarta” n tin come l nord e l sud d Italia, però Piee n chei ane l era è pì nportante e i comandea lore.
Federico Soldano no l era farina da fei ostie; anbizios, l stentèa a sotestà a le richieste de dà schei a chi da Piee che i tirea su par conto de Venezia, e l golèa fei n tin de testa soa.
Visto che l se conportèa mal, no l rispetèa le legi veneziane, l Consilio de la Serenissima Republica l se à riunì a Piee e l à decidesto de mandà le milizie a Domeie par feisse dà i schei e fei rispetà le regole.
I avarae mandà n esilio l Soldano (belo tel cognome se po liede “solde-da no”), se no l avesse pagà na multa de 50 scudi, e n pi l dovea presentasse a Piee entro tre dì par fei publica amenda del modo sbaglià de conportasse.
Chesti soldate, n marcia tra Piee e Domeie, i à fato stà n grumo mal la dente, che era usada a laurà e tase, come che faron ncora al dì de ncuoi; era da vargognasse pa n fato così estremo.
E sucesso n casoto anche parchè l nobile venezian Contarini, che comandèa i soldade de Piee, l se avèa betù da la parte del Soldano. Na delegazion del Consilio de Piee l é duda fin a Venezia par risolve sta disubedienza, tanto che Tiziano stesso l é intervenù par difende so neodo e mete a tase la cuestion.
Tre ane à durà la storia, e a la fin Soldano l à dovesto dì a Piee, dì sul barcon de la finestra del palaz dela Comunità che varda do la piaza, e con duta la dente sote l à dovesto liede le scuse. No l era par nia d acordo e con rabia l à bucià par tera l foi, e sbatendo la porta l é caminà. Dopo n tin l é tornà coi so soldade e i à fato n barufon dandossele a pi non posso. Pi “zenza leie e litiganti” de così…
Dopo diverse ane, la storia la se à chietà e, forse iutà da so barba Tiziano, l é tornà a fei l governator de Domeie. No é restà nissun del casato dei Soldano, la raza se à perso par strada, e a dì la verità no l era da Domeie. No golarae che pagone colpe che no è nostre!
Se po comunque crede che l deto sea nassesto da chesta storia. Ciaponela zenza nrabiasse, calcosa i dovèa pur dìne.
Pal deto “chi passa Domeie e Vodo passa ogni logo” siguramente aveone calcosa de negativo n comun; anche ca me piasarae savé se a Vodo fosse na traza che spiegasse meo la maldicenza.
(Domeie)