Prose e poesie bellunesi 2010/Tornar inte la tera
 |
Questo testo è incompleto. | |
| ◄ | 16 | 18 | ► |
ELIANA OLIVOTTO
Tornar inte la tera.
La bala la vita in compagnia de la tera …
ciarori de piuma e scuro pesto,
ricami su veli de nebia
che pian pian la se desfa.
Ormai l é raspà su l oro del fien
Al sarà vita
Par i dì che vien,
intant le montagne tira l fià,
lore che da sempre le stà là
e no se le move
in fra n respir de rasa
e n s-ciap de viole.
Granpadi a l erta, veci gabiot dei contadin
i te conta col so len marz
che la vita la finis.
Ma fiori bianchi i se slarga sora i pra,
fiori de Coleridge,
i te dis la verità de n sogno
e le busie che la vita te à contà.
Al vien do pal troi al vecio,
col so darlin vodo su la schena,
an pas drio man, al camina
pa ndarse a polsar, che l é rivada sera,
al ghi core drio al sòn
e intant che l sogna, al spera.
Come na capa,
nuvole sora la so testa.
Na fumera.
Tornar inte la tera.
Esser tera.
(Ospedal, segnalata al Premio letterario “G. Noventa - R. Pascutto”, S. Stino di Livenza, 2009)