Historias dil munt sogn Gieri/19
 |
Questo testo è incompleto. | |
| ◄ | 18 | 20 | ► |
La schenderletga sut il vonn.
Els plauns leu nua ch' ils dus Reins alpins
Ensemen van a bratsch sco frars vischins,
2605 Leu en in vitg cun bia curtins ed èrs
Vivevan bia signurs e purs, parlers.
Ed ina dunna er' ei leu d' anflar,
Che veva treis mattauns de guvernar.
La giuvna dalla mumma malvesida,
2610 Schege perderta, fuva maltenida.
Il de mitgiert stovev' ell' en cuschina
Persula far e suspirar adina.
Maner stueva ella sut in vonn —
Ei era de star mal per quei affon. —
2615 Las autras vevan bien e bialaveta
E sefittavan brav per far paretta.
In di la schenderletga maltractada
Sper sia fueina stat fetg contristada,
E mira giu sil tratsch sper il furnell',
2620 Havend cavau la tschendra orda quell,
Ell' anfla leu in vau sco in tunnell,
Che va el tratsch. Ed ella va sil stell
Sin plirs scalems in toc giu per la scala
E vegn en ina pintga clara sala,
2625 Leu sesa ina femna sper la fueina,
Ell' ei de fatscha passa, mo sereina.
La matta stat surprida, temeletga:
„Mo buca tema, paupra schenderletga!“
Di cheu la femna. Jeu hai preparau
2630 Per tei da seida in vestgiu biblau,
Cun steilas d' aur cusidas bein lient.
Cu tias soras van en ornament
A biala stiva tiel signur barun,
Retuorna cheu, jeu dun a ti caschun
2635 De prender part dil bi divertiment,
Ti deias era ver tiu legherment!“
Sul vitg sesaulza il casti sil crest,
Ed il barun vul far in giug honest,
Per allegrar siu fegl, ch' ei returnaus.
2640 Il scheiver el casti vegn preparaus.
Leutier ein envidadas las giuvnettas,
Ils sunadurs cun gegias, clarinettas
Comparan el casti ed intoneschan
Ils instruments, ch' ensemen s' accordeschan.
2645 La schenderletga vesa gia pinadas
Las soras per quei giug seluschardadas.
E suondond gl' avis della veglietta
Sut il furnell passond giu per scaletta,
Vegn ell' en stiva sut gl' arviul zuppada
2650 Da sia protectura bein fittada.
Cul bi vestgiu de steilas provedida,
Ell' ei en biala stiva comparida,
Da tuts presents vegn ella admirada,
Dals giunchers biars ludada e tschercada.
2655 Havend saltau treis cul fegl dil barun,
Tenor avis enquer' ella caschun
De seretrer dal giug, e mond a casa,
Fa ella la lavur de fumitgasa,
Pervesa las pluscheinas en cuschina,
2660 E fa termagls e tschontscha cun mintgina.
In temps pli tard gliei puspei veta viva
El palas dil barun e biala stiva.
La schenderletga vesa mond las soras,
Ed ella passa giu tras quellas foras
2665 Tier sia protectura beinvulenta:
Quell' ha pinau mondur' aunc pli stupenta:
In vestgiu blau cun si la biala glina;
La schenderletga tuorna sin cuschina
E va modestamein cugl ornament
2670 En stiva biala dil divertiment.
Neu dal cantun dils sunadurs activs
Arrivan suns harmonius e vivs.
Cul fegl barun va ella puspei treis,
Sin ella miran tuts ils leds burgheis.
2675 Tenor commond denton la schenderletga
Untgescha gleiti, buca senza fetga,
Retuorna alla veglia siu vestgiu
E stat sco cuschaniera spel burniu:
La notg sto ella sut il vonn dormir,
2680 Il di luvrar cun larmas e survir.
Aunc ina tiarza gada eis ei stau,
Ch' ei vegn sil crest - casti sunau, saltau.
Las nauschas soras van leu da bun' ura,
La schenderletga tier la protectura
2685 Descenda tras siu vau misterius,
Survegn in mantel aunc pli maiestus:
In vestgiu blau, cun si il bi solegl
Cusius cun fils ded aur sil fin bategl,
Leutier aunc terlischonts e bials scalfins,
2690 Ch' ei dat d' anflar zanua aschi fins.
La schenderletga va tiel legherment,
Las melodias han oreifer bi accent;
Sil puffet emplunai ein biscutins,
En ils boccals fan spema nobels vins.
2695 Il pievel legher lai plascher schambuns,
E denteren resunan las canzuns.
Cul fegl barun danovamein saltar
Sto nossa schenderletga, d' admirar.
Sco tschellas ga vul ella lu denton
2700 Spert seretrer tier siu furnell e vonn.
Il fegl barun va suenter la regina,
Pli bial' ei quella leu che finadina:
La giuvna en la fugia silla scala
Sto perder in scalfin en la caniala.
2705 Cun in scalfin a casa mo mitschada,
Vegn ella dalla veglia avisada,
Ch' il fegl barun enqueri sco per spusa
La matta en mondura schi pompusa.
Tras la pantofla el casti restada,
2710 La schenderletga ei vegnid' anflada:
Pertgei curriers ein î per empruar
Tgeinina dellas giuvnas sappi star
Cul pei endretg en quei scalfin anflau —
Tier quella matta eis ei gartigiau.
2715 La spusa cul vestgiu solegl ei ida
Da sia protectura instruida
Sil crest casti e stada ventireivla —
E la historia para fetg carteivla.
La cuschaniera Tina vestgida tut en ner,
2720 Sin tgau la schlappa muotta, retscheiv' il condoler
De tut la compagnia. Amiez il legherment
Sia malencurada als hosps fa endament
La vanadat mundana, la fin de nossa sort,
Mesjamna della tschendra e la passiun e mort.
2725 La vieua resignada denton ha in confiert,
Siu Victor vegn tier ella e di cul scret aviert:
„Mirei, o cara mumma, ei tucca uss a vus!“
La Tina di l' historia dil tgaper dolorus.