Poesie (Porta)/147/2 - I noster sciori hin tutt infuriaa
 |
Questo testo è completo. | |
Carlo Porta - Poesie (XIX secolo)
147/2 - I noster sciori hin tutt infuriaa
| ◄ | 147 - 1 - E che? Signori miei? Che vi credete? | 147 - 3 - La cros de Malta, per quell ch'hoo sentii | ► |
I noster sciori hin tutt infuriaa
per la notizia ch’han avuu l’oltrer
che in Sicilia han faa ’l Bergom Cavalier
e disen che l’è on tort che gh’è staa faa.
Ma mì se v’hoo da dì la veritaa5
(e già savii che son puttost sincer),
disi che inscambi l’è staa on bell penser
e che l’ha da portann utilitaa;
perché se st’orden l’han instituii
per defenden daj Turch, daj Algerin10
come me par d’avè semper sentii,
l’è cert ch’el noster Bergom, sanguanon!
se ghe dan el comand d’on brigantin
je fott là tutt se fussen on million.