Poesie (Porta)/157 - Se sont staa darensc a scriv

Da Wikisource.
157 - Se sont staa darensc a scriv

../156 - Quand on scior pien de danee ../158 - Chi m'ha in del venter stravoltaa i buvij? IncludiIntestazione 27 settembre 2008 75% poesie

Carlo Porta - Poesie (XIX secolo)
157 - Se sont staa darensc a scriv
156 - Quand on scior pien de danee 158 - Chi m'ha in del venter stravoltaa i buvij?

 
Se sont staa darensc a scriv
l’è per via, sur patron,
che sont omm on poo tardiv
in di coss de applicazion;
gh’hoo del coeur, ma in de quij coss5
che no poss, per brio! no poss.

Quand se tratta de drovamm
cont i gamb e cont i brasc,
sfidi on olter a ciappamm,
me farev anca in spettasc.10
Ma in di coss de drovà el coo
l’è de grazia e anch tropp se voo.

Né l’è poeù nanch on impegn
sè via là come se sia
quell de scriv a on omm de ingegn15
vertuos come Usciuria,
e de scrivegh on trattin
cont di rimm in meneghin.

Chè la lengua buseccona
no l’è minga ona giambella20
de biassas inscì alla bona
spasseggiand coj man sott sella:
sì cocô... per scriv polid
ghe voeur olter che i cinqu did!

Oltra quest hoo poeù anch capii25
che l’è chi dove el me voeur
per vedè se hoo tolt partii
daj lezion che con tant coeur
el m’ha daa in quell’occasion
che hoo faa el cambi del patron.30

Ma resguard a sto punt chì
s’el gh’avess on quaj sospett
ch’el domanda cunt de mì
al sò amis don Benedett;
lu el dirà, ch’el me cognoss,35
se foo onor o nò al sur Ross.

Lu el dirà che el dì e la nocc
ghe stoo semper lì vesin:
a curagg del dì i saccocc,
e de nocc l’acquasantin.40
N’eel insci ch’el m’ha ordenaa
de stagh semper attaccaa?

Lu el dirà che in grazia mia
el gh’ha el gust ogni moment
de stà insemma de Usciuria45
perché mì gh’el giri in ment.
N’eel anch quest on orden so
de dagh gust pù che se pò?

Lu el dirà che el se toeu el spass
tanci voeult de famm saltà50
coj soeu man, senza curass
che me possa gibollà.
N’eel inscì lu ch’el m’ha ditt:
Scoeudegh pur tutt i petitt?

Lu el dirà che sont discrett,55
che nol obbleghi a fà spes,
che per duu strasc de zampett
l’hoo giamò servii tant mes.
Duu zampett! ch’el varda lu
se poss vess discrett de pù?60

Ma per cunt del Tordorò
ghe n’hoo ditt tant che sia assee.
Donch ch’el senta per cunt so
quell che adess ghe infilzi adree
e ch’el diga in fin di facc65
se el Morett no l’è on mostacc.

Se regordel d’avemm scritt
a proposet de servì
ch’el gh’aveva anch lu el petitt
de vegnì a Milan con mì70
quand fuss bon de fagh avè
on patron compagn del mè?

L’hoo servii mì, el gh’è el soggett,
alto donch ch’el corra scià;
el ghe zed fina el sò lett75
per el gust d’avell in cà,
el ghe giura de dagh fina,
s’el le voeur, lacc de gaina.

Per indull a vegnì prest
el ghe dis anch quest de pù,80
che servì el sarà on pretest
ma el servii l’ha da vess lu
e s’el voeur a tutta manca
el ghe dà anca carta bianca.

Ma l’è, temp de fagh savè,85
sur De Ross, chi l’è el soggett:
no el le voeur compagn del mè?
Ben: l’è giust don Benedett,
sì, l’è lu quell bon lasagn.
Podel vess pussee compagn?90