Poesie (Porta)/1 - El sarà vera fors quell ch'el dis lu
 |
Questo testo è completo. | |
Carlo Porta - Poesie (XIX secolo)
1 - El sarà vera fors quell ch'el dis lu
| ◄ | Dedica | 2 - Mè cugnaa l'Ambrosin quell candiron | ► |
El sarà vera fors quell ch’el dis lu,
che Milan l’è on paes che mett ingossa,
che l’aria l’è malsana, umeda, grossa,
e che nun Milanes semm turlurù.
Impunemanch però el mè sur Monsù5
hin tredes ann che osservi d’ona cossa,
che quand lor sciori pienten chì in sta fossa
quij benedetti verz no i spienten pù.
Per ressolv alla mej sta question,
Monsù ch’el scusa, ma no poss de men10
che pregall a addattass a on paragon.
On asen mantegnuu semper de stobbia,
s’el riva a mangiá biava e fava e fen
el tira giò scalzad fina in la grobbia.