Poesie (Porta)/57 - A CERTI FORESTEE CHE VIVEN IN MILAN E CHE NE SPARLEN
Questo testo è completo. |
A CERTI FORESTEE CHE VIVEN IN MILAN
E CHE NE SPARLEN
Ode
Merda ai vost ariezz
marcanaggi pajasc de forastee!
Andee foeura di pee,
tornee pù per on pezz,
fenela sta regina di finezz!5
I avessem nanca vist
col fagottell sott sella a intrà in Milan
biott, descolz, a pescian,
magher, umel e trist,
sti gran bondanz, sti malarbetti crist!10
Hin staa chì, s’hin faa su
lenc e petard col noster cervellaa,
che abonora el gh’ha faa
slongà el coll come i grù,
e adess, porconi, el ghe fa ingossa anch lu!15
Nun pover buseccon
se semm strengiuu in di cost per fagh el loeugh
de scoldass al nost foeugh,
e lor cont el carbon
se spassen via a tengen el muson!20
Merda, ve torni a dì,
marcanaggi pajasc de forastee!
Andee foeura di pee,
e innanz de tornà chì
specciee deprima che vel diga mì.25
E chi hin sti forestee
che se la scolden tant contra Milan?
Hin Chines, hin Persian?
Sur nò: hin tutt gent chì adree,
hin d’italia anca lor... Peh! la minee!30
O Italia desgraziada,
cossa serv andà a toeulla cont i mort
in temp che tutt el tort
de vess inscì strasciada
l’è tutt de Tì, nemisa toa giurada!35
Sur sì, se te seet senza
legg e lenguacc, se tutt hin forestee
i tò usanz, i mestee,
se a dilla in confidenza
te tegnen i dandinn, l’è Providenza.40
E fin ch’el natural
nol te giusta on deluvi o on terremott
l’ess inscì l’è nagott,
mej i Turch coj soeu pal
che l’invidia e i descordi nazional.45
Ma stemm alla reson:
eel sto porch d’on paes che ve despias?
Lassell in santa pas;
andemm, spazzetta, allon!
V’emm forsi ligaa chì per i mincion?50
Alto donca, tabacch!
Andee foeura di ball sanguededì!
Già che podem guarì
la piaga del destacch
forsi mej col butter che coj triacch!55