Scritt in la soa delizia de Senagh
Alto scià penna, carta e carimaa,
e giustemma el nost cunt, sur Martinell:
ch’el varda chì che hoo giusta preparaa,
tiraa foeura anca mì el mè cuntarell;5
a lu: tant per lenzoeu slisaa e sporcaa,
tant per pan, per pittanza e firisell;
a mì: tant per falzett e gipp s’cioppaa
a furia de paccià come on porscell;
a lu: tant per carrocc innanz indree,10
tant per caffè, sorbitt, acqu e bombon,
tant per latt, ciccolatt, cruzzi e contee;
a mì: tant per la tolla del faccion,
tant per cremor de tarter al speziee,
tant al dottor per l’indigestion.15
Vedi a la conclusion,
sur Martinell, che i cunt hin lì per lì,
se fors’anch no me ven quajcoss a mì,
come sarav a dì:
tant per la frustadura di ganass,20
per i dent de nettass, e de strappass,
e, per el vegnì grass,
tant de pù in di vestii de tila e pann,
ch’el capirà che l’è minga pocch dann,
e massem in sti ann25
ch’el vestiari l’è montaa a quell segn
che mej che grass l’è asquas vess in di legn;
donca lu col sò ingegn
el vedarà che a vorè stà a rigor
restarev mì a la longa creditor;30
ma no stemm a descor
de danee... pover lu... nò... el me fa tort...
se incontraremm... già no semm minga mort...
E poeù, femm de sta sort,
ch’el tegna sald... puttost tornaroo chì35
a stà con lu ancamò per quindes dì.
