Poesie (Porta)/93 - La mia povera nonna la gh'aveva

Da Wikisource.
Jump to navigation Jump to search
93 - La mia povera nonna la gh'aveva

../92 - Semm giamò ai vott de April, gh'emm la stagion ../94 - RICCHEZZA DEL VOCABOLARI MILANES IncludiIntestazione 27 settembre 2008 75% poesie

Carlo Porta - Poesie (XIX secolo)
93 - La mia povera nonna la gh'aveva
92 - Semm giamò ai vott de April, gh'emm la stagion 94 - RICCHEZZA DEL VOCABOLARI MILANES

 
La mia povera nonna la gh’aveva
on vignoeu arent ai Pader Cappuscin:
el guardian ghe le benediseva:
i soeu fraa ghe beveven mezz el vin.

La nonna in del morì la me diseva:5
Te lassi sto vignoeu, el mè Franzeschin;
s’el voeur bev el guardian lassa ch’el beva:
usellin tira a casa el porscellin.

Quand ecco tutt a on tratt Napoleon
el dà ona soppressada ai fratarij.10
S’ciavo suo, sur vin, la protezion.

Credeva de fann pù nanch on boccaa:
inscambi mò hoo impienii tucc i vassij,
inscambi hoo bevuu anch quell che dava ai fraa.

Eppur in sti agn passaa15
gh’avarev giugaa el coo che senza lor
no scusavem né nun né nost Signor!