Śà che ancuoi sto nosc benedeto Piovan

Za che ancuoi sto nosc’ benedeto Piovan e Calonego Don Zuane Batista Rudiferia l’ ha ra bela sorte de ciantà ra so seconda Messa Novela voron anche nos, se no outro, almanco fei vede el nosc’ bon cuore co i c’iantà ara ampezzana sta canzon.

Ma ancuoi sì che i sciopetéa!
Ah! non elo gnanche bel?
Duto quanto cigiréa
Da Tofana a Crepedel!

Sì, par Crista! che deboto,
Co se trata del Piovan,
Ben, o mal, ʼna fre’ de moto
Fego anch’ jò par ampezzan.

Varda là, ce onor, ce smaja,
Che li ha fato a Parsenon!
Varda là, c’ e na medaja
Che l’ abù dal nosc’ Paron!

Cuore donca da Zachéo!
No voron restà in avòs!
Parchè ancuoi l’ è ʼl Giubileo
E par El, e anche par nos.

Sù! godòssera de gusto
Duto quanto el santo dì!
Su, c’ianton, che l’ è de justo:
Rudiferia e po no pì!

Savon ben, che a duto Ampezzo
Se ʼl Piovan no fosse stà,
Ra i zirave mal da un pezzo,
Besen dì ra verità.

Viva! viva el nosc’ bon vec’io!
Chel ch’ El dis, el voron fei!
Voron tuoiselo par spec’io
Dute quante, e pize e grei!

Ah! zon pu davòs ʼa zapores
Del nosc’ vec’io santo, e ʼl diau,
Lassa pu ch’ el tende trapores
Ch’ el no en mai pi da un c’iau.

Ah! mangare fosson boi
De fei sempre chel ch’ El disc’!
Sì la fè! vel dìgo, fioi,
Zisson dute in Paradis.

Digo anch’ jò, che l’ ha da sbate
(Pardonamera Signor!)
L’ ha da fei con savie e mate,
Se ʼl vo’ fei da bon Pastor.

No vedéo c’e grun de zente
Che l’ è bon de confessà?
Pì ʼl lavora, e manco ʼl sente;
L’ è de fer, e po zalà.

Ma ra voi finì: da resto
Disè pu c’e, che vorè;
Un Piovan compain de chesto,
No par Dia! che no ghi n’ è.

Alo! animo, da brave!
Tolè dute el goto in man,
D’ Agabona infin a C’iave
Crajòn: Viva el nosc’ Piovan!

Preòn dute ancuoi san Zuane,
Che l’ è ʼl Santo del so gnon:
Ah! lassamelo cento ane!
E po outro no voron!