Poesie (Porta)/110 - I PUTANN AI "DAMM DEL BESCOTTIN"

Da Wikisource.
Jump to navigation Jump to search
110 - I PUTANN AI "DAMM DEL BESCOTTIN"

../109 - SOLITA STOCCADA DE AKMETT ../111 - Nò Ghittin: no sont capazz IncludiIntestazione 27 settembre 2008 75% poesie

Carlo Porta - Poesie (XIX secolo)
110 - I PUTANN AI "DAMM DEL BESCOTTIN"
109 - SOLITA STOCCADA DE AKMETT 111 - Nò Ghittin: no sont capazz

 
I PUTANN AI "DAMM DEL BESCOTTIN"

Malarbetti slandronn del bescottin,
tanto ruzz, tant spuell contro i putann!
Perché? Perché la dan per pocch lanfann
e la dan minga sott a balducchin?

Vergogna! Tasii là ch’el semm anch nun5
perché cossa bajee; bajee, bajee
perché sii vecc strangosser che morbee,
che no voeur refilavel pù nessun.

E quand serev bej, gioven e grassott
e stagn e prosperos, disii, o damazz,10
serev allora inscì nemis del cazz?
la davev forsi via per nagott?

Nagott on corno! i mee delicadonn,
domandeghel on poo ai voster servent
coss’han spes ogni voeulta a mettel dent15
in quij vost illustrissem figazzonn.

E i palch e i carroccett e i sorbettitt
e i faravost e i scenn e i mascarad
e i accord e i bigliett e i fest, i entrad,
hin danee, facc de porchi! o fasoritt?20

E poeù gh’avii el mostacc, veggiann calvari,
de romp el cuu al Governo per fà esclud
quij tosann che la dan per on mezz scud?
Citto là: sii nanch degn de stagh in pari.