Poesie (Porta)/121 - Akmett in tocch comè la porcellanna
 |
Questo testo è completo. | |
Carlo Porta - Poesie (XIX secolo)
121 - Akmett in tocch comè la porcellanna
| ◄ | 120 - Ah cristo cristo che mortalitaa! | 122 - PER LE GABELLE E DAZI ESORBITANTI IMPOSTI DAL MINISTRO PRINA NON SI PENSA PIÙ A FOTTERE | ► |
Akmett in tocch comè la porcellanna,
magher comè el ritratt de nost Signor,
strasciaa comè i strivaj d’on sfrosador,
pestaa comè el soffà d’ona sguanguanna;
pelaa dal reficciô come ona ranna,5
pien ras de debet come on giugador,
pussee affamaa che né on procurador,
sgognaa comè el marì d’ona veggianna;
cusii in cà come dent in d’ona scattola,
colla donna sul fà d’on zoffreghett10
che tacca e fa fioeu comè ona piattola:
cribbi! se lor no senten compassion,
sta voeulta el va anca lu el pover Akmett
a toeull in pros comè Napoleon,
giacché la religion,15
o quella cossa che ghe disen squitta,
l’inebiss anca a Akmett de toeuss la vitta.