Poesie (Porta)/28 - Bravi i mee Gambaritt! Se Dio el v'ha daa
Questo testo è completo. |
Carlo Porta - Poesie (XIX secolo)
28 - Bravi i mee Gambaritt! Se Dio el v'ha daa
◄ | 27 - FRA DIODATT | 29 - Signor, se in quanto omm certi travaj | ► |
Bravi i mee Gambaritt! Se Dio el v’ha daa
la deslippa de vess curt de danee
a tutta manca el v’ha poeù compensaa
con fior de tolla che la var pussee.
Deffatt con quij sproposet rezitaa5
con franchezza e prononzia de Verzee
avii daa on bell ajutt alla zittaa
che, poverascia, l’eva in gran cuntee.
Però, trattandes de vorè juttalla
a comprà quij cavaj che ghe besogna,10
podevev con pocch pù portalla in spalla.
L’eva el cas de fà porta per nagott
e poeù con bona pas della vergogna
voltà là alla platea el forell biott;
scometti che in d’on bott15
ve mettevev in stat coj vost talent
d’avegh cavaj per quatter reggiment.