Poesie (Porta)/30 - I SETT DESGRAZZI

Da Wikisource.
Jump to navigation Jump to search
30 - I SETT DESGRAZZI

../29 - Signor, se in quanto omm certi travaj ../31 - Sto bell mas'ciott, sto noster patronscin IncludiIntestazione 27 settembre 2008 75% poesie

Carlo Porta - Poesie (XIX secolo)
30 - I SETT DESGRAZZI
29 - Signor, se in quanto omm certi travaj 31 - Sto bell mas'ciott, sto noster patronscin

 
I SETT DESGRAZZI

On pover cereghett schisciamicchin,
per toeuss sto carnevaa on divertiment,
l’ha pientaa ona pastoccia ai soeu parent
e l’è sghimbiaa alla festa al Teatrin.

Però per no fà tort al collarin5
el s’è vestii de mascher bravament,
barattand contra on scud de pagament
l’abet de pret in l’abet d’on pollin.

Ma el Diavol, nemis nassuu e giuraa
de tucc i cristian, ma anmò pussee10
de quij che gh’han sul coo quell’O pelaa,

prevedend fors ch’el studi o la fortuna
podeven tirall foeura del vivee,
l’ha ressolt de strozzà el prevost in cuna

e el teghe n’ha faa vuna15
proppi maggenga e pesc della tempesta,
che in pocch paroll, senza tant franz, l’è questa.

Appenna sulla festa
el ghe spediss incontra on bell donnin
cont on cuu pù redond d’on pomm poppin,20

de moeud che l’Abbadin,
che l’è de carna infin, che infin l’è on omm,
nol pò de manch de pettà i ong sul pomm,

e in quella on galantomm
de quij tal della gippa de Baltramm25
el ferma al vol sto bell sciampin d’Adamm.

Ah traditor infamm
d’on demoni! va là: corregh adree,
fagh pur fà de maross anch la minee

intant ch’el va a pollee!!30
Va là: sattisfet pur, fa i tò vendett,
d’ona desgrazia faghen foeura sett,

demoni marcadett!!
Sissignor, proppi sett, nanch vuna men,
cuntej, e vedarii se dighi ben.35

Vuna: l’arrest. Dò: el pien
coj soeu de cà che pronten la cannella.
La terza: i guaj e el rughli della soa bella.

La quarta: la querella
e el nihil transit de Monscior Vicari.40
La quinta: el benefizzi che va all’ari.

La sesta: el vestiari
de pagà al mascaree fin che ’l stà dent,
ciovè a tutt sabet grass comodament.

L’ultema, finalment,45
quella d’avè daa el nas in d’on poetta
che spantega sto fatt con la trombetta.