Poesie (Porta)/80 - A LA SURA LENIN MILLESI

Da Wikisource.
Jump to navigation Jump to search
80 - A LA SURA LENIN MILLESI

../79 - Quand vedessev on pubblegh funzionari ../81 - Subet che sevem sett a on tavolin IncludiIntestazione 27 settembre 2008 75% poesie

Carlo Porta - Poesie (XIX secolo)
80 - A LA SURA LENIN MILLESI
79 - Quand vedessev on pubblegh funzionari 81 - Subet che sevem sett a on tavolin

 
A LA SURA LENIN MILLESI

Se fuss bon de fà vers all’improvvisa
sì, che vorrev fà el mutt in st’occasion!
Ghe giuri che vorrev dagh dent de frisa,
e el giuri da onorato buseccon;
sont galantomm, e quand ghe rivi a dì5
che sont on asen ch’el le creda a mì.

E tanto mej poeù adess che la me inziga
con quell ton cordial, con quell cierin,
con quell fà inscì grazios ch’el par ch’el diga:
Fatt coragg, dì pur sù el mè meneghin,10
che infin dopo disnaa per rid de coeur
hin giust quatter sproposet che ghe voeur.

Sproposet? Nò per brio! Adasi on poo;
gh’hoo la botta secretta... scià el biccer:
Viva sura Millesia el sò bell coo,15
el sò bell anem, el sò coeur sinzer;
viva el sò spiret che se pò cercall
via de sti mur, ma stantà assee a trovall;

viva sura Millesia quell tuss coss
che fa corr per la bocca la saliva20
de tucc quij che le tratta e el le cognoss;
eviva donca, milla voeult eviva.
Aala mò vist adess se a sto proposet
gh’hoo anch mì la vergna de sparmì i sproposet?