Poesie (Porta)/99 - Rivi de Barlassina appenna adess
 |
Questo testo è completo. | |
Carlo Porta - Poesie (XIX secolo)
99 - Rivi de Barlassina appenna adess
| ◄ | 98 - PER EL MATRIMONI DEL SUR PEPP VANDELL DOTTOR FISICH COLLA SURA TERESIN SILVA | 100 - Sura Caterinin, tra i bei cossett | ► |
Rivi de Barlassina appenna adess
dove sont staa dò nocc e tutt on dì
e de asnitt d’ogni etaa, de tucc i sess
n’hoo vist on milla senza cuntamm mì.
Eppur, per vess tanc asen e per vess5
el sò mes de incazziss e de sgarì,
ch’eel che no eel, scior mio, resti de gess:
vun che l’è vun no l’hoo sentii a zittì.
Se nol fudess che soo coss’hin in asen,
besti goff, incapazz de riflession,10
che no san perché raggen, perché tasen,
podeva fors anch ess che ghe insegnass
a sciarnì foeura on contrattemp pù bon
de sospend i soeu vers per repossass.
Chè mì seva là a spass15
e minga per sgonfiamm i zebedee
de supplì ai soeu versori cont i mee.