Ra nostra bandiera

Ra nostra bandiera,
R’ on sempre daante
Col tzielo lanpante,
Ogni ora del dì.
On, la su ra tzimes,
El bianco de ʼl jatzo
Tacà al paonatzo
Del tzielo, el pì bèl.
E sote ra cròdes
El verde de i bosche,
De i prade, de i losche
Che Dio, El m’ a donà.
Ra stèma sul canpo
De chiste colore,
R’ on senpre intz’ el cuore:
Ra nostra “Edelweiss”.
Chel fior, de ra cròdes
Tra i fiore, ʼl pi raro;
Chel fior, el pi caro,
Parce che le el nòsh!
Co’ r’ anima d’ oro,
Che ʼl vieste d’ arzento;
Che sol Ie contento
De stà, lasù, in pash!
Par chesta, el se sfida
Co’ r’ enfa de i vènte,
Coi sguatze, e i tormente
Che i manda zò ʼl tziel.
Cushi son nos–òutre,
Tacade a ra cròdes;
Che invetze de lòudes
Voron libertà!
Che, càn che d’ inverno
El nieve ʼl me cuerze;
Speton, ‒ par daèrze,
D’ òushuda, ‒ el nosh cuor.
E intanto preon Dio
Che i nostre colore:
De pash e d’ amore,
I torne a trionfà!