Ra toses da Cortina
 |
Questo testo è da formattare. | |
Ra toses da Cortina
Ra zoentù d' Ampezzo
Stà sempre sa ra piazzes
Ma el par de no crede
Chi che no po' vede
Ches pòsse fei così.
See vea, see festa,
Es va a piena testa
De buseles e buscietes
Poco oro ma tropo arzento
Es va via come el vento.
De fazorete no né da portà
Prin de duto es pensa là,
Ma se soldi es no ghi n' ha
Debito es farà.
De palegrès un burò pien
Ié là folade come el fen,
E zoletes e zoletoi
Par se strense, su’ i galoi.
De magnes e meza magnes
E de giaides no vardon
Che vien in fin pascion
A vede tanta roba
Par squerse chera goba.
Es ha anche ra bustines
Sta nobil signorines
E ce tirà sora ches farà
Parcé che i tos vade là.
E canche i sa sposades
I' ha un puin de baccalà.
De ciameses l' è da vardà sora
Chi globe che pendòra
E chi strasces verde, ros e zal
Somea sempre carnaal.
De calzes no ragionon
Che i ome no’ po' vede
E stizà nos fason
Ma ra pi autes
Es và fin al galon.
I scarpe si vede ‘na fré
Ié tirade sun chel pé.
Ma che zone agnò che voron,
Come zertes Ampezzanes
Una meo no ghin ciatòn.
Ades ci hares betù su
Arlòe e mantelines
I guadagnes de sta nines
Iè dute in for el….
Ades es se dà anhe el sbeleto
Par se bete su’ museto
Se vede da bonora a sera
Che es se cambia de ziera.
L’é proprio un gran consumo
De muscio e glicerina
No fasonse de mereea
Se s' è pienes de garlures.
Es laora duto l' an
Par vestirse an par an.
De ra ciadeneles no’ vardon
Che res porta par mostron
Ma veramente l' è ben algo
Tanto piombo a pendoron.
Ancora algo m' è resta in drio
Sul ciapel e s' ha un desio,
E s' ha da dì el vero
Es vorae el struzzo intiero.
Sarae ancora algo
Ma dutto no’ digion
Che se una o r' outra
Restasse brandol
E me fasarae bette en preson.
Saesà da ve slizzà
Vardà de me avisà
Che una peso de chesta cà
Vedarè che ra ciapà.
Se vi n' aè a mal
Ve préo de me pardonà
Se chesto carnaal
Ve voré maridà.
El par proprio de no’ crede,
Duto quanto chesto cà
Ma l’ é robes che se vede
E che se parla in verità.
Al di d' anquoi
Es no sà pi de ce ver sì
E s' es seguita così….
Poco ben ai zirà un di.