Poesie (Porta)/64 - IN OCCASION CHE S.S.C.M. L'IMPERATOR E RE FRANZESCH PRIMM E L'IMPERATRIZ E REGINA MARIA LUISA ONOREN CON LA SOA PRESENZA ONA RAPPRESENTAZION COMICA E ONA CANTADA IN MUSEGA

Da Wikisource.
Jump to navigation Jump to search
64 - IN OCCASION CHE S.S.C.M. L'IMPERATOR E RE FRANZESCH PRIMM E L'IMPERATRIZ E REGINA MARIA LUISA ONOREN CON LA SOA PRESENZA ONA RAPPRESENTAZION COMICA E ONA CANTADA IN MUSEGA

../63 - ON ESEMPI ../65 - LAMENT DEL MARCHIONN DI GAMB AVERT IncludiIntestazione 27 settembre 2008 75% poesie

Carlo Porta - Poesie (XIX secolo)
64 - IN OCCASION CHE S.S.C.M. L'IMPERATOR E RE FRANZESCH PRIMM E L'IMPERATRIZ E REGINA MARIA LUISA ONOREN CON LA SOA PRESENZA ONA RAPPRESENTAZION COMICA E ONA CANTADA IN MUSEGA
63 - ON ESEMPI 65 - LAMENT DEL MARCHIONN DI GAMB AVERT

 
IN OCCASION
CHE S.S.C.M. L’IMPERATOR E RE FRANZESCH PRIMM
E L’IMPERATRIZ E REGINA MARIA LUISA
ONOREN CON LA SOA PRESENZA ONA RAPPRESENTAZION
COMICA E ONA CANTADA IN MUSEGA CHE LA SOZIETAA
ACCADEMEGA DI FILODRAMMATECH
LA GHE TRIBUTA IN DEL SÒ TEATER
LA SIRA DEL 6 MARZ 1816

Canzon
Musa nostrana, che te gh’ee el coeur pien
d’amor, de gratitudena, de stima
vers on SOVRAN che te voeur tanto ben,
va là: digh sù quaj rima
col tò solet lenguagg s’cett e leal,5
tant ch’el veda anca LU
l’impronta natural
che stampen de per tutt i sò virtù.

SACRA MAISTAA, la veritaa l’è vuna,
ma on Prenzep che se degna de sentilla10
e de fagh ciera l’è ona tal fortuna
che se dà minga in milla:
per quell LU el god del santo don del ciel
d’aveghela d’arent
interpreta fedel15
del batticoeur de tant million de gent.
Per quell denanz a LU se dan de man
e ciappen spiret tutt i noeuv sorell,
gloria di nost ingegn italian,
e l’è giusta per quell20
che cold bujent de tanta protezion
procuren in sta sira
de respondegh a ton
de quella istessa lenna ch’el ghe ispira.

Oh quante voeult in su sti scenn l’Alfieri25
el n’ha faa corr el fregg giò del firon
col depengen al viv cuntee e miseri
de re prepotenton!
Inscì per la magia di pittor
ona nocc fosca e negra30
la cress forza e splender
al contrappost d’ona bell’alba allegra.

E chi sa fors che intorna del sò bust
nel sgoratta l’Alfieri con l’ombria,
e che in sto pont nol goda fors con gust35
l’effett de sta magia!
Inscì spionaven i pittor antigh
fassaa sù in del tabar
l’effett di soeu fadigh
battend la ronda intorna ai soeu telar.40

Ah sì, SACRA MAISTAA! la soa clemenza,
l’amor paterna che ghe scolda el coeur,
la soa giustizia, l’alta soa sapienza
hin i roeus, i vioeur,
hin el lumm de quell’alba incarnadina,45
che corr denanz a Lu
a dà ona scorlidina
e a dessedà del sogn tucc i virtù.

Nun sora tutt la sentem l’importanza
de sto descantament e, giust per quest,50
on dì de tanta gloria e de esultanza
no l’imbròjem col rest,
ma el sègnem anzi incoronand Goldon,
che coll’avè retraa
i pù car di passion55
l’ha appont depengiuu i sò, SACRA MAISTAA!

Inscì tucc quij fadigh e tucc quij spes
ch’emm faa, che femm e semm despost a fa
per mejorà i costumm del nost paes
ne vegnaran a dà60
quell frutt che cerchem, ch’emm fissaa in la ment,
deggià che no se pò
rivà mej all’intent
che presentandegh on modell par sò.

Adess a Lee mò Sura PATRONSCINA65
a spiegagh al PATRON sti vers nostran;
a Lee con quella soa bella grazijna
a voltaghj in toscan;
ah sì, SACRA MAISTAA! se Lee la voeur,
la po’ fa che sti rimm,70
che hin buttaa là dal coeur,
deventen de maross anca sublimm.