Compendio biblico in lingua genovese/Chì se contèm como lo nostro Segnor ameistrava li soi desipori aprovo la cena e ge disse le cosse chi deveam esse de la soa passiom
 |
Questo testo è completo. | |
| ◄ | Chì se contèm como li principi e li saserdoti fem consego per ocir lo Segnó, e chi se incomensa la Passiom de lo Segnó messé Ihum. Xpe. | Chì se contèm de la ruserisiom de messé Ihu. Xe. | ► |
Chì se contèm como lo nostro Segnor ameistrava li soi desipori aprovo la cena e ge disse le cosse chi deveam esse de la soa Passiom.
Or messé san Zoane sezeiva a la tora con lo Segnó, inpersochè ello era monto garsom, e ancora lo Segnó lo amava monto teneramenti, ch'e l'avea za ordenao de lasálo in so logo a soa Maire, lantó messé san Zoane se vozè inver lo Segnó e si ge disse: "Segnó, chi è quello chi te dè trai?" E messé Ihu. Xpe. si ge disse: "A quello a chi e darò la[sic] pan bagnao". E messé Ihu. Xe. si pigià1 um bochon de pan, e si lo bagnà inter lo vasello, e si lo dè a mangiá2 a Iuda figio3 de Simon Scharioto, e quando messé san Zoane ave visto e inteizo so, e nisum de liatri non se acorssem
chi dixesse lo Segnor de gram feressa che ne fava a messé sam Zoane evangelista, e de so o fo tuto stremio, e vosse responde a messé san Pero so che lo Segnó ge avea dicto, ma lo Segnó non vosse inpaihá la soa passiom, perssoché se messé san Zoane avesse dicto a san Pero: "Iuda è quello chi lo dè trai", san Pero lo avereiva incontenente morto, ma lo Segnó non vosse, e inpersò san Zoane si cheite sum lo peto de messé Ihu. Xe. e, como strangossao, o se ge adormì monto forte su lo schosso, e non poè responde a messé san Pero so che ello vorea, e lantora messé san Zoane inpreize tuta la sotilitai de la devenitae de la scriptura, onde ello sape dí quella maravegoza parola: "In principio erat verbum, e verbum erat apud deum, e deus erat verbum". E questa parolla fo de tanta sotelitae, che o non fo mai homo vivente chi la poisse expone bem conpiamenti.
Or quando Iuda Scharioto ave mangao quello bochum de pam che lo Segnó ge ave' daito, incontenente lo demonio intrà in ello, ben che o g'era za intrao, e in questo lo Segnó ne dà ameistramento che niguna persona non dè prende lo corpo de Xe. con peccao, persochè lo demonio è aparegao de vegní aperso[sic] como a Iuda, chi avea preizo indegnamenti lo pan beneito che messé Ihu. Xe. ge dè, e inpersò lo desiporo se levà indegnamente, e si ze a ordená con li Zué che elli se aparegassem la note per vegní a prende messé Ihu. Xe., e lo Segnó, chi savea ben unde ello andava, si ge disse: "O Iuda, so che ti dei fá, falo tosto", e nisum de li atri desipori non inteizem so che ello dixesse quella parolla a Iuda, e se pensavam che, quello che o dixeiva, che o lo dixesse persochè Iuda era lo spendao, e tegnea la monea, e pensavam che lo Segnó ge avesse comandao che ello zeisse a catá archune cosse chi avessem bezogo[sic] a la Poasqua, o che ello devesse dá quarcossa a li poveri.
Or seando partio Iuda, messé Ihu disse a li soi desipori: "Aora sarà crusifficao lo Figo de la Vergem e lo Figo de Dee, e crucifficao in ello, e ello per si mesmo se crucifficherà in Dee, o figoi me, um pocho de tenpo e starò con voi atri e poa e me n'anderò, e unde e vago ora voi atri non poi vegní, ma o ge verei bem possa, e ve dago novo comandamento, che voi ve debiai amá l'um l'atro cossì como mi o amao voi, e piaschum cognoserà che voi sei me desipori se voi averei amó e caritae inseme". Dissem: "Segnó, unde vai-tuo?". Respoze messé Ihu. Xe.: "Unde e vago, voi non ge poressi anc[o]ra vegní, ma voi me segirai bem poa". Disse san Pero: "Perchè non te poss-e aora seguí, che sum aparegao de mete l'anima mea per ti?" Respoze messé Ihu. Xe.: "Ti di che ti metterai l'anima toa per mi, e te digo in veritae, che avanti che lo gallo cante, tre' vota in questa nocte ti me negerai, e che ti non me vissi mai ni sai chi me sea". Alaora o fo archuna contenciom inter li desipori, qua de ló fosse mao, alaora disse lo Segnó: "Li re e li principi segnorezam le lor gente, e quelli chi am segnoria sorve li atri si sum dicti 'segnoi', ma inter voiatri o non ve cognosse che quello chi è mao inter voiatri si lo meno, e quello chi sarà lo meno sarà lo mao, e sun inter voiatri como aministrao, e voi fossi quelli chi romagnessi con meigo in le mee tentaciom, e mi ve o dispozo lo mé regno, cossì como lo mé Paire lo a dispozo a mi, asochè voi mange' e bevei conmeigo in la mea mensa in lo mé regno e sezai sum le sedie e zuigerei li XII tribu de Issael". E poa o disse a Simon Pero: "Vete che Satanas serchava za de tentave, asochè o ve partissi l'um da l'atro, ma e o pergao[sic] per ti, asochè la toa fe non vegne men, e cossì singularmenti archuna vota conferma li toi fraelli". E messé san Pero disse: "E sum aparegao de reseive prexom e morte per ti". E lo nostro Segnor ge disse anchora: "Avanti che lo gallo cante questa nocte, tre' vota ti me negerai e dirai che ti non me cognossi". E anchora o ge disse: "Quando archuna vota e ve mandai sensa sacho e sensa casai, mancàve mai archuna cossa?" E elli respozem: "Segnó, o non ne manchà niente". Disse lo Segnó: "Aora e ve digo che chi non a cotello vende la gonella e si l'acate, e si ve digo in veritae che tuto so che è scripto de mi, e l'è bezogno che o se conpissa, e aora le cosse chi sum dicte de mi se conpissem". Or li desipori, non intendando so, si dissem: "Segnó, e l'è chì doi cotelli" e lo Segnó ge disse: "Asai ge n'è". E poa o ge disse: "Non se turbem li cor vostri e non abiai poira, crei in Dee e in mi, e starei conmeigo in lo mé regno, e in la caza de lo mé Paire sum monte abitaciom, e persò alegraive, che e ve vogo aparegá lo logo, asochè dond'e sum voiatri seai, ni savei unde e sea vegno[sic] ni donde e vaga, ma voi lo saverei bem". Poa o disse messé san Tomao: "Noi non samo unde ti vagi e in qua logo possamo noi savei la via". Disse messé Ihu. Xe.: "E sum via e veritae e vita, e nisum non po vegní a lo mé Paire, ni a mi, salvo per mi, e voi si cognosei mi e cognosei lo mé Paire, e zomai o lo veirei e si lo cognoserei". E lantó san Feripo disse: "Segnó, mostra a noi lo to Paire e tuto so che ti ne di si ne basta". Respoze messé Ihu. Xe.: "E l'è tanto tenpo che e sum staito con voiatri e non me avei cognosuo. Feripo, quello chi vè mi, si vè lo mé Paire. O doncha, como dic-to che te mostre lo mé Paire? Non crei-to che lo mé Paire sea in mi, e mi in lo mé Paire? Le parole che ve digo non ve le digo da mi mesmo, avanti, e l'è lo me Paire chi è in mi che in mi e parla per lo mé Paire, e quello è lo mé Paire in mi, e a lo men creai in le overe che e fasso, che e ve digo in veritae, che quello chi creirà in mi e in le overe che e fasso, e ello farà le mé overe, e anchora moi che e fasso, e vago a lo mé Paire, e tuto so che o demanderei a lo mé Paire a lo mé nome, ello ve lo darà, asochè lo Paire sea gloriffichao in lo Figo, e lo Figo in lo Paire, e tuto quello che voi demanderei, e pregerò lo mé Paire, e ello ve darà lo mé sprito consolao, chi tuto tenpo starà con voiatri, e quello sarà sprito de veritae, lo qua lo mondo non ve porà levá, pesochè lo mondo non lo vè ni lo cognosse, ma voi veraxementi lo cognoseri[sic] ch'è con voi, e non dubiai che ello non ve laserà orffani. E verò anchora a voiatri avanti de grande tenpo, e lo mondo e non me cognoserà, ma voiatri si me veirei e cognoseri[sic], inpersochè e vivo e voiatri viverei, e in quello iorno voi me cognoserei, che e sum in lo mé Paire, e voi in mi, e mi in voiatri. Chi ode lo me comandamento e l'oserva, quello è quello chi me ama, e quello chi ama mi, si amerà lo mé Paire, e mi amerò lo mé Paire e mi mesmo me manifesterò a ello". Disse san Iuda Tadé: "Segnó, che cossa è che ti mesmo te mostri a noi e non a lo mondo?" Respoze messé Ihu. Xe.: "Quello chi ama mi, si ama lo mé Paire, e chi non ama mi, ni ama lo mé Paire, ni la mea parolla, ni la goarda, e la parolla che voi avei odío non è mea, avanti, e l'è de lo mé Paire chi m'a mandao. E queste parolle e ve digo stagando con voiatri a lo prezente, lo Sprito Santo, lo qua manderà lo mé Paire in lo mé nome, quello ve manifesterà e si ve insegnerà tuto quello che e v'o aora dicto. La mea paxe e ve dago, la mea paxe e ve lasso, non como questo mondo e ve la dago, ma como lo mé Paire la dà, cossì e la dago a voiatri. Or non seam contrube' li cor vostri, e non pianzei: voi avei odío so che e v'o dicto, e si vago e vegno a voi, e si vago a lo mé Paire, e se voi me amassi, serto o non ve allegrereissi, inperssochè e vago a lo mé Paire, e lo mé Paire si è mao de mi. Tute queste cosse ve le digo avanti che elle seam faite, asochè le creai avanti che elle seam faite, aora e non parlerò monte cosse con voi, che lo principo de questo mondo si è vegno[sic] contra de mi, ma ello non a nissuna raxom in mi, ma asochè lo mondo cognosa lo mé Paire e che e l'è mao Segnó, lo comandamento che o m'a daito, e fasso. E sum la vija e mé Paire si è lo lavorao, e tuti li rami chi in mi non faram fruto, e li tagerò e ziteròli de fora, e tuti quelli chi in mi faram fruto, o li aconserà, asochè e fassam fruto. Or voiatri sei za beneiti da lo mé Paire, e vogo che voi sapiai una cossa, che cossì como lo ramo non po fá fruto da si mesmo se ello romarà in la vija, avanti, o secherà, cossì voi non porei fá fruto se voi non romarei in mi. E sum lo sepo e voi atri sei li rami, e tute le me' parolle saram in voi, tute le cose ve saram aparegai, e tute le cosse che m'a daito lo mé Paire, e le o oservai, e si sum in lo so amor so che digo, e lo digo asochè la mea alegressa sea con voi e la mea alegressa sea conpia. Or questo è lo me comandamento, che o ve degai amá l'u l'atro così como e o amao voiatri, o non po esse mao amao in nissum como in la soa anima per li soi amixi. Or no piamerò voiatri servi, avanti, e ve piamerò amixi, che lo servo non sa so che lo segnó fa, avanti, e ve piamerò amixi, che tuto so che e o, e l'o da lo mé Paire, e si lo manifesto a voiatri, e persò voi porterei fruto, e lo vostro fruto durerà per tuto tenpo. Non ve maravegiai se lo mondo v'a in odio, o v'a in odio che voi non sei de lo mondo. Si voi fossi de lo mondo, lo mondo amerea so che fosse so, ma in veritae voi non sei de lo mondo, avanti, e ve ne levai, asochè voi andai e fasai fruto, e lo vostro fruto dure per senpermai, e persò voi orerei lo mondo, che lo servo non è mao cha lo segnó, unde, se elli me perseguem, elli perseguiram voiatri, e se elli goarderam la mea parolla, elli goarderam voi e la vostra parolla, ma tute queste cosse e le faràm a voi, che elli non cognoseràm lo mé Paire in mi, e se o non ge fosse vegnuo e non g'avesse parlao, elli non aveream peccao, ma elli non am schuza de le lor peccae, che elli desprexam mi e lo mé Paire, e se non avesse faito le overe in elli, le que' nissum homo non avereiva faito, e tute le am viste in mi, e inpersochè elli non am vossuo cognosse mi, ma tuto so acaze asochè le proffecie se conpissem, e so che è scripto è: Elli me averam in odio per li servixi. Ma quando verà lo mesagé chi me manderà lo mé Paire, soè lo Sprito de veritae, lo qua procede da lo Paire, e quello si darà testemonio de mi, persochè, da lo comensamento in sa, ello è staito con meigo. Or e ve digo queste cosse, asochè non seai schandalizai in mi, che elli ve buteram fora de la segnoria, e verà tenpo che quelli chi non rieram, si penseram fá um gram servixo a Dee, e tuto elli faram, persochè elli non cognoseram lo mé Paire ni mi, e queste cosse e ve le digo asochè, quando queste cosse saram faite, che o ve arecordai che e ve le o dicte, e non ve dissi queste cosse da l'icomensamento[sic], persochè era con voiatri, e ve le digo pesochè[sic] e vago a quello chi m'a mandao, e nigum de voi non me demande unde e vago, persochè e ve o dicto che e me ne vago, li vostri cor sum pim de tristessa, ma in veritae e ve digo che e l'è mesté che e me ne vage, inpersochè, se non zeisse, lo Sprito Santo non vereiva in voiatri, e, quando o verà, o reprenderà lo mondo de justixa e de zuixio e de peccao, e poa o reprenderà quelli chi non am cretuo in mi, de justixia, persochè vago a lo mé Paire, e de chì avanti voi non me veirei, de zuixio, persochè lo principio de questo mondo sarà desmiso e zitao, e v'o a dí monte cosse, ma ora voi non le poi reseive, ma quando verà lo Sprito de veritae, ello ve mostrerà tuta veritae, e non ve parlerà da si mesmo, ma tute quelle cosse che ello odirà da mé Paire, si le farà a savei a voi, e in quello iorno ello me clarifficherà avei tute le cosse de lo mé Paire, persochè ello ve recovererà da mi e anoncierà a voiatri, e averà[sic] che in pocho tenpo voi non me veirei, e uno atro tenpo che voi me veirei. E vago a lo mé Paire". E li desipori dissem inter lor mestessi: "Che vo dí so, che ello ne dixe: In pocho tenpo voi non me veirei e in pocho tenpo voi me veirei? Noi non samo che cossa voga di questo 'pocho'". E messé Ihu. Xpe. cognosea che elli lo voream demandá, e ge disse: "Voi de so ve maravegai, che e ve o dicto: in pocho me veirei e in pocho non me veirei. Or ve digo in veritae che voi sospirerei e pianzerei, e lo mondo se ne alegrerà, e voi starei tristi, ma la vostra tristessa se convertirà in alegressa, la femena quando e l'apoartisse[sic] a l'a tristessa, persochè a sente lo dolor de lo apoartí, e quando a l'a apoartio a non se arecorda pu lo dolor, tanta è la alegressa che ella a quando ella vè lo figor in lo mondo; per voiatri e averò dolor, ma poa e ve darò alegressa, e quella alegressa nissum non ve la po levar ni prende, e in quello jorno voi non ve pregerei nissuna cossa. Or e ve digo in veritae, che se voi demanderei a lo me Paire in lo me nome, ello ve darà tuto, asochè la vostra alegressa sea conpia, e so che e ve parlo, e ve parlo in proverbi, ma o verà tenpo che e non ve parlerò in proverbi, anti, e ve parlerò pareizementi de lo me Paire, in quello jorno che voi demanderei de lo me nome a lo me Paire, mi pregerò che o ve daga atro Sprito consolaor, e non pregerò lo me Paire per voi, che non ve ameistra, che lo me Paire si ve ama, inpersochè o m'amai. E insí da lo me Paire e si vegni in lo mondo, e aora e lasso lo mondo e si vago a lo me Paire". Respozem li desipori: "Aora e vegamo bem che ti parli pareizementi e non di archuin proverbi, ma e vegamo pareizementi che ti è insío da Dee, e si samo che tu sai tute le cosse. Disse alaora lo Segnor: "Levaive e insí de chì, che per certo o vem la ora che voi me laserei soreto, bem che e non posso esse soreto, che lo me Paire si è senper con meigo, e de so e ve ameistro, che voi abiai paxe inter voi, che grande tribulaciom averei in lo mondo.
Disse messé san Pero: "Se tuti t'abandoneram, e mi non te scandelizerò ni zamai e ni te abandonerò". Respoze messé Ihu. Xe.: "In veritai e te digo che questa nocte, avanti che lo gallo cante tre' fia, ti me negerai e dirai che ti non sai chi e me sia[sic], e questo dirai a tuti quelli chi te voram odí". Disse san Pero: "Se pu e bezogno che e mora conteigo, e non te abandonerò". E semegeivementi dissem tuti li atri disipori. E lantora messé Ihu. Xe. vegne a una villa chi a nome Gloesemani, la qua era de là da lo fiume, lo qua era apellao Sedeom, e lì era um orto une[sic] ello intrà con li soi disipori. E Iuda traitó savea ben quello logo, persochè o g'era staito monte vote, e stagando lì, lo Segnor o disse a li soi desipori: "Stai cocì e orai tanfin che e vage cocì a orar". E preize in soa conpagnia san Pero e san Iacomo e san Zoane, e partise tanto lonzi da liatri como sarea um traito de prea. E lantora lo Segnó se incomenssà a dorei4 e a contristasse in fra lé mesmo, e pianzea monto e dixea: "Tristo è l'anima mea fin a la morte, stai chì fermi e orai con meigo". E alargasse in pocho da elli, e inzenogasse in terra, e fe oraciom a lo maire[sic] e disse: "Paire mé, se poesse trapasar questo carexo da mi in questo ora". E poa o disse ancora: "O dosse Paire, a ti è possibille tute cosse, renova[sic] da mi questo carexo, niente deme e tuto sia faito a la toa vorente' e non segondo la mea". E poa o vegne a li soi desipori e si li trovà adormij. E disse a Pero: "Voi non ave[sic] posuo una ora vegar comeigo, vegai e orai asochè non intrai in tentaciom, persochè lo sprito e pronto [m]a la carne è inferma". E ancora lo Segnó se alargà da li desipori e se misse a la oraciom digando: "Paire, se po esse che e non beive questo carexo, soè la morte, sea faito a la toa vorente'". E lantora a lé parse lo angero da cel chi lo confortà, e ello orando forte si nassè in ello una grande bataga, soè inter l'anima e la carne, inpersochè in la carne si vegne si grande spaventamento, che ello non poea soferir la morte, ma lo sprito e la raxom si ge consentiva sensa alchuna contradiciom, e de questo o ge vegne um tar suo, chi se ge convertì in gote de sangue che cheitem fin in terra, e depoi questo, ello si tornà a li soi desipori e trovàli adormij, persochè elli eram monto agrevai de sono, e ello, lasandolli, o tornà a orar. La sengonda fiá o disse quelle mesme parolle che o disse la prima, e tornà ancora a li desipori e trovolli[sic] adormij e ge disse: "Dromí e reposai in pocho, persochè e l'è vegnua l'ora che e sarò in le maim de li peccoi". E poa, staito per um spacio, si ge disse: "Segnoi, voi non ave possuo vegá comeigo, per mé amó levaive tosto suza, echave Iuda chi me vem a prende e dame in le main de li peccoi: veve che o non a dormio, ma5 e l'è staito pronto a vegare[sic] per fá lo traimento, persochè voi non sei staiti a orar".
Or lo treitó de Iuda avea daito per segná digando: "A quello chi abraserò e baxerò per lo[sic] bocha, quello sarà deso, e prendei quello e tegnílo streitamenti". E quando elli fon a lo logo, e lo Segnó chi savea bem so che deiva esser, si se fe inver elli e si ge disse: "Segnoi, che demanda-vo voi?". E elli ge dissem: "E demandemo Ihu. Nazareno". E lo Segnó si se fe inver elli e si ge disse: "Segnoi, e sum desso". E incontenente, como e l'ave dicto "E su deso", elli, como spaventai, se tiràm in pocho inderré e ceitem in terra quaxi como morti, e lo Segnó ge disse anchora: "Chi demanda-vo voi?" E elli dissem: "Ihu. Nazareno". E lo Segnó ge disse: "Segnoi, non ve e[sic] dicto che sum deso? Or doncha, se voi me serchai, lassai andá questi atri". E questo disse lo Segnó per conpí la parolla che ello avea dicto a so Paire: "Quelli che ti me deisti e non n'o perduo nigum". E depoí questo, lo treitó de Iuda se acostà a lo Segnó e ge disse: "Ave rabi" chi è tanto a dí como "Dee te salue meistro, bem posi-tu stá". E lo Segnó ge disse: "Amigo, a che e-tu vegnuo?" E Iuda se acostà a ello e abrasàlo e baxallo per la bocha, e lo Segnó ge disse: "Con segná de paxe tu traisti lo Figor de lo homo e de la Vergem". E lantor quella mravaxe gente che Iuda avea menao conseigo se acostàm e missem man a lo Segnor per voreillo prende, e li desipori, vegando so, che elli voream prende lo Segnó, si dissem: "Segnó, voi-tu che e li feriamo de cotello?" E um de li desipori, so fo san Pero, non aspeità la responsiom de messé Ihu. Xe., per lo grande amó che o ge portava, e incontenente o misse man a um so cotello, e tiràlo fora de la goeña, e vosse ferí sum la testa a um, e ferillo sum la orega destra, e tagagella. Or questo, a chi san Peiro tagà la orega, era um servo de lo principo de li sarsedoti, e avea nome Marcho, e lo Segnó disse: "Basta so che voi avei faito". E preize la orega e tornàla in la testa e si ge la sanà, e poa o disse a san Pero: "Pero, torna lo cotello in la gueña. Non voi-tu che beva lo carexo che mé Paire me a donao? Che e te digo che chi ferirà de cotello, de cotello sarà ferío.[sic] Non pensi-tu che e possa pregá lo mé Paire chi incontenente me manda pu de XII legioin de angeri per aiáme? O conven pu che beiva questo carexo, lo qua me a mandao lo mé Paire, e se so non fosse, e che non feisse cossì, como se conpireiva le scriture e li dicti de li proffeti, per che e l'è mesté che cossì sea faito?". E poa lo Segnó disse a la turba che l'eram vegnuo a prende: "Voi me sei vegnui a prende con le arme, como se fosse um lairo: son-e staito ogni di in lo tenpio con voiatri? E perchè non me prendeivi voi? Ma tuto questo è faito perchè se conpisse le scripture e li dicti de li proffeti, che questa e l'ora vostra, e lo poiste' de le trenebe[sic] ve fa fá so che lo demonio, chi è staito vostra gia, a oschurao lo cor vostro, per tá modo che voi non avei possuo odí lo[sic] voxe de la dotrina che ve dava". E lantó quelli mizeri assorbai si preizem messé Ihu. Xe. e si lo ligàm forte, cossì como se ligam li lairi, e quando elli lo avem cossì ligao, elli corsem adosso a li desipori chi tuti fuzin e abandonavam lo Segnó, aseto san Zoane chi era grasom chi non poiva fuzir, e persò ello fo tegno per lo mantello, e lo mantello o lo lassà in le main de quello chi l'ave' preizo, e fuzì in gonella.
Or tute queste cosse la Dona le conservava in la soa mente, e si savea bem che la scriptura non poiva mentí, si che ella era in grande spavento aspeitando che queste cosse se conpissem, e persò ella era tuta smaria, e quando ella odì la voxe de messé san Zoane, si respoze e disse: "O figor Zoane, che nove sum che ti ai aduto de lo mé Figor? E unde è lo to maistro?" E messé san Zoane respoze: "Madona, sapiai per certo che ello è preizo e che Iuda, um de li desipori, si l'a venduo a li Zué per trenta dinai, e si l'am forte ligao e si ne l'am menao, ma e non so unde elli se ne seam andaiti con ello.
Or quando Ana pontificho ave visto messé Ihu. Xe. che li Zué ge aveam menao, si se lo fe mená davanti e si ge incomensà a demandá de li soi desipori e de la soa dotrina6: "Che dotrina è questa che ti vai perdicando per Iudea e per Ierussalem, e vai prevarichando lo mondo e la gente grossa?" E lo Segnó respoze: "La mea dotrina non è mea, ma è de lo mé Paire, e si sai bem che o pralao pareizementi per tuto lo mondo, e niguna cossa e non o aschozo ni dicto, ma davanti a tuta la gente, e demandane a quelli chi m'an odío, che tuto lo povo sa tuto so che o faito". E quando messé Ihu. Xe. ave dicto queste parolle, si vegne um servo de quello Ana, si levà la man e dè una grande maschá a messé Ihu. Xe., e con grande ira o ge crià adosso e disse: "Tu respondi cossì a lo pontifficho?" E alaora lo Segnó se vozè inver ello con grande umilitae e si ge disse: "Se o má parlao, rendi testimonia de má, e se o ben dicto perchè me feri-tu?" In queste cosse messé Ihu. Xe. ne ameistra che noi degamo portá tuto per so amó, e tute le ingurie chi ne sum faite, cossì como ello le portà per noi.
la[sic] qua era demestego de lo vescho e era con messé san Pero, e pregà lo porté che ello lo lassase intrá, e san Pero, chi era romazo de fora si intrà in lo paraxo, e poa che ello fo dentro, si se misse a seze con li ministri, asochè ello visse la fin de lo faito. E lantó tuto lo consego de li principi e de li previ e de li sarsedoti de li Zué si serchavam de avei fasse testemonie incontra a messé Ihu. Xe. per poillo acuzar e condanálo a la morte. Or, agando parlao monte fasse testemonie, elli non travam[sic] in lé ni corpa ni caxom per che ello devesse esse condanao a morte, ni de atro mà, e a la fin o se levà doe fasse testemonie chi dissem: "Noi ge amo odío dí che ello destruerà lo tenpio de Dee e che in trei di o lo farà". E queste testemonie non eram convegneive. E messé Ihu. Xe. non dixeiva niente, e poa o se levà suza lo somo saserdoto in mezo de ló e disse a messé Ihu. Xe.: "Non respondi-tu alchuna cossa a tute queste cosse de che questi te achuzam?" E messé Ihu. Xe. pu taxea e non respondeiva niente. Disse lantor lo pontifficho de li saserdoti: "E te sconzuro per de vivo che ti me digi se ti é Xe. Figor de Dee beneito". E lantó messé Ihu. Xe. non vosse che lo nome de lo so Paire fosse sconzurao invan, e si respoze a Caiffas: "Tu lo di, ma che vá, che se lo dirò, voi si non me lo creirei, e se ve demando, voi non me responderei, ni anchora voi me laserei, unde in veritae e ve digo che voi veirei anchora vegní lo Figor de la Vergem in le novere de lo selo con grande possansa e vertue, e seze de la destra parte de lo Dee Paire". E lantora e dissem tuti: "Adoncha ti é Figor de Dee". E messé Ihu. Xe. disse: "Voi lo di persochè e lo sum". E lantó li principi de li saserdoti, per grande ira de so, si ge aferàm la roba che ello avea indosso e squasangela fin a li pee, e dissem: "Ello a iastemao! Or doncha che bezogno [...] noi de avei atre testemonie contra questo homo? Voi avei odío la grande iastema che ello a faito e dicto, e che ve ne par?" E tuti respozem a una voxe: "Serto e l'è degno de morte". E lantor Caiffas fe despogá messé Ihu. Xe. tuto nudo, e si lo fe ligá a una corona, e si ge fe inbindá li ogi, e si ge fon intorno con coreze, e atri con bastoim, e atri ge davam con le main, e atri ge strepavam la barba e la testa, e atri ge butavam lo lavago per lo vizo e per le carne, e atri ge spuavam per la fassa, e cossì lo nostro Segnó stava ligao a la corona, e davange de li bastoin sum la testa, e poa dixeivam: "Xe. proffetiza chi è quello chi t'a ferio". E in questa mainer[sic] stè lo nostro Segnó tuta quella nocte. O mizero peccao chi non poi sostegí[sic] in pocho de pena ni de travago per lo to Segnó, chi a tanti oprobij sostegno per lo to amor e per arvíte le porte de vita eterna, e quando poreisi-tu sastiffá a tanta bontae, o peccao, va a lezi[sic] quante jasteme butava lo Segnó a quelli chi ge favam tanto má, e goarda che ello dixe: "Paire selestiá, questi non cognossem lo má che elli fam, perdonege se te piaxe".
ave cossì parlao, incontenente ello odì cantá lo gallo , e lo Segnó se revozè e goardàge per lo vizo, e incontenente san Pero s'arecordà de le parolle che ge avea dicto messé Ihu. Xe. a la sena, che "avanti che lo gallo cante tre' fiá tu me negere'". E eciamdee o se arecordà como ello avea promisso a lo Segnó de non abandonallo mai, e lantor messé san Pero se partì e insì fora de la caza e se ze a mete in una fossa lì rente e incomensà a pianze fortementi lo so peccao, si che de li avanti o non stè mai sensa lagrime, per che o covegne che ello portasse contuniamenti quarche sudario per sugásse lo vizo.
Or, peccao, pensa in pocho in che giza stava la Dona de fora de lo paraxo, e odiva le cuze che favam incontra de lo so Figor e li corpi che ello sostegniva, e si non odiva nissum chi lo schuzase ni chi lo defendesse, ma a l'odiva voxe chi dixeivam: "Moira, moira questo marvaxe peccao!" Or qua è quella maire chi non dega avei conpaciom de la Maire de lo Segnor e de tanta curdelitae como fo faita a lo so Figor sensa corpa ni pechao. Queste dolente maire stem tuta quella note ascotando la pena che portava lo so Figor.
Or quando elli fon justrai a caza de Caiffas, si ge fon averte le porte, e intràm tuti dentro, e la Dona, chi era de fora, vosse andá dentro a trová lo so Figor, ma ella non avea posansa ni vertue de andá in caza per la grande spressa de la jente, si che ella ne fo rebutá de fora con dezonor.
tuto sangoe, si che a veillo o non parea che ello avesse figura umana, e ben se conpì so che Isaia proffeta disse de ello: Non est in eo specie neque decor. Or la Maire chi pu se goardava intorno e questo so Figor a non lo poea cognosse, e persò ella se revozè a la Madalena e si ge disse: "O figora, gorda[sic] inter quelli se ti ge cognossi lo to maistro". E la Madalena si ge lo mostrà, e si ge disse: "Sapiai, Madona, che e l'è quello chi è cossì fragelao, è lo to Figor". E la Dona si lo goardà e si lo recognossè, e incomensàge a criá aprovo, cossì como ella poiva, e cressè la voxe e pu forte e crià e disse: "O Figor, unde è andaita tanta belessa, tu eri lo pu bello che visse mai, e auora tu é cossì canbio! O Figor a-te cossì abandonao lo to Paire, che ello non te defende da tanta peña? O Figor mé pietozo, perchè voresti-tu torná in Ierusalem? Za saveivi-tu bem che li Zué percasavam de voreite dá morte". Misese la Dona in la spressa per pernde[sic] lo so Figor, ma li serventi la rebutavam e la destasavam per modo che a non se ge poiva aprosimá.
Quando li principi e li saserdoti vin che Iuda avea butao la monea de lo traimento, si la fem pende[sic] e dissem: "O non è licita cossa a noi che e metamo questi III- dinai in lo propio de lo tenpio, inpersochè e l'è prexo de sangoe". E avem so consego e acatañe um canpo de terra tegente de che se fava le pignate, e era quello canpo dritamenti d'um pignatá, e dem quello canpo a lo comun per esse sepotura de li pelegrin, e fo piamao quello canpo tan fin a lo di de anchoi Aichedemac, chi vo tanto dí como 'sangoe' in lenga nostra, e cossì fo conpia lo proffecia de Ioromia proffeta quando ello disse in voxe de lo Segnó: "Lo prexo per lo qua e sarò aprexao da li figi d'Issael e l'am daito a um canpo e um pignatá".
sabato e vo destrue la nostra leze de li nostri pairi". E Pilato ge disse: "Avei-vo voi atra acuzaciom incontra a questo homo?" E li Zué dissem: "Noi amo in la leze che o non se dè cura in lo sabato, e questo a curao monti maroti in lo dicto jorno". Disse Pilato: "Non è marofficio curá infirimitae[sic], ma e l'è grande bem. E g'è atra caxom che voi acuzai?" Dissem li Zué: "Noi te pregemo che ti te lo faci vegní davanti e che ti l'odi". E Pillato disse: "Dime per che caxom me sea licito zoigá nissum ré ni pu odillo, avegnachè sea vostro reto". E li Zué dissem: "Noi non digamo miga che ello sea re, ma ello mesmo lo dixe". E lantora Pillato disse a um so messo chi avea nome Aniniamo [...] Xpe. inter su lo paraxo, e lo meso vegando messé Ihu. Xe. si ge disse: "Lo vicario manda per ti". E poa questo se trè lo facio10 de testa e si orà messé Ihu. Xe. e poa o desteize lo facio in terra e ge disse: "Segnó, e ve prego che voi andai super questo facio, e che super questo voi intre' in lo paraxo". Or li Zué vegando lo grande onó che questo fava a messé Ihu. Xe., per grande invidia, dissem a Pillato: "Perchè ai mando tá meso con tá ordem?" E ge dissem como questo avea orao Xe. e desteizo lo facio in terra. E Pillato si mandà per lo messo e si ge disse per che ello avea faito so, e lo messo si ge disse: "Segnó, quando ti me mandasti in Ierusalem a Alexandrio, e vi questo Xe. chi sezea sum um polerim de azena, e tuti li figi de li Zué si ge andavam deré con li rami de li erbori, e vi che monti de lor butavam li rami e le lor vestimente sote li pé de lo polerin, e tuti criavam: "Beneito sea quello chi è vegnuo in lo nome de lo Segnó, osana in elsesis!" E lantó li Zué criàm tuti adosso a questo e dissem: "Li fantin cantàm in lenga ebraicha, homo grezo, como poi-tu intende so che e se dixessem?". E Pillato disse: "Che vo di 'Osana'?" E li Zué dissem: "Segnó fane sarvi". E Pillato disse: "Voi aproai la veritae che an dicto li fantin: perchè doncha a falio lo messo?" De che elli non sapem che responde. E lantó Pillato disse a lo messo: "Va de fora e, in che modo se sea, menlo[sic] dentro". E lo messo si insì anchora de fora e fe cossì como e l'avea faito avanti, e disse a lo Segnó: "Intra dentro, messé, che lo vicario te demanda". E intrando lo Segnó in lo paraxo, le bandere chi tegnivam li bandere' se inchinàm tute in terra e fem reverencia a messé Ihu. Xe., e, vegando so, li Zué si incomensàm a criá fortementi contra li bandere' chi tegnivam le bandere, e Pillato disse: "Veve che grande segná è questo, che quando questo homo intrà dentro che tute le bandere se sum inchinae e si ge am faito grande reverencia". E li Zué dissem: "Noi amo bem visto chi li banderai am faito so". Alaora Pillato disse a li Zué: "Elezei atri bandere' forti e posenti, e si veiremo la veritae". Or elli elezèm atri chi tegnivam le bandere, e Pillato mandà messé Ihu. Xe. de fora, e poa o ge mandà lo messo, e lo meso ze e desteize lo facio como e l'avea faito l'atra vota, e pregà messé Ihu. Xe. che ello zeise super lo facio e che lo vicario mandava per ello, e tornando lo Segnó in lo paraxo de Pillato tute le bandere se inchinàm como a la primera vota, e, vegando so, Pillato si fo monto spaventao e levasse de la soa sedia e pensava monto in quello che e l'avea visto. Or, stagando Pillato in questo pensamento, soa mogé mandà a dí che o goardasse como se fisse[sic] incontra questo homo, che per nissuna cossa ello devesse fá nissuna novitae inver de ello, persochè e l'era homo justo e sensa resa, e che in monte peñe o l'aveiva sostegnua, e che monte vixioim in quella nocte e l'aveiva visto, e questo fava lo demonio per destrubá la Passiom de messé Ihu. Xe., asochè ello non perdesse la possansa ch'e l'aveiva sorve la gente. E quando Pillato ave intezo[sic] so che soa mogé ge avea mandao a dí, si fe piamá li Zué e si ge disse: "Voi savei bem che mea mogé ora e cre in li vostri dee". E li Zué dissem: "Noi samo bem che cossì è". E lantó Pillato ge disse: "Veve che a m'a mandao a dí che a mi non me apertèm fa niguna cossa incontra de questo homo justo". E li Zué dissem a Pillato: "Non t'amo noi dicto che questo è incantao? E con li soi malefficij e l'averà mandao quarche fantaxia a la toa dona." E lantó Pillato disse a lo Segnó: "Non odi-tu quanto má dixem questi contra de ti, e si non ge respondi niente?" E messé Ihu. Xe. ge disse: "Se elli non avessem lo poei, elli non parlereivam, ma persochè piaschum am la soa bocha de dí má e bem, elli dixem so che e vorem, ma goardem quello che e dix[e]m". E li Zué respozem a messé Ihu. Xe.: "Che demo noi vei, noi digamo che ti è nao de fornichaciom segondo che in la toa nativite' fon morti monti grazoim in Betelem per toa caxom, e persò to paire Ioxep e toa maire se ne fuzim in Egito e non avem ardimento de stá in la soa gente". E um Zué de lo tribu de Iuda, lo qua era monto venerabe homo chi avea nome Nicodemo, si disse davanti a tuti: "Non n'è cossì como voi dí, che ello non è nao de fornichaciom, noi samo bem che Iox[e]p si spozà Maria e persò o non è nao de fornichaciom". E lantó Pillato disse a li Zué: "Doncha se l'è inter voi discordia, e che non seai de um vorei, a questo pá che sea invidia inter voi contra questo." Ma e crao bem che matermonio fosse inter Ioxep e Maria. E Ana e Caiffas dissem a Pillato: "Ognomo cria ch'e l'è nao de fornichaciom e pin de ogni malefficio, per che ti non dei cre' a questi, ma ti dei bem cre' a questi chi sum preffeti e soi desipori". Respozem quelli chi dixeam che ello non era nao de fornichacio, e lo nome de questi si è Lazaro, Austerio, Anthogno, Iacomo, Sezaro, Samuel, Isac, Fines, Crispo, Agripa, Conino e Iuda, e dissem: "Noi non semo ipocriti, ma e semo figor de Dee e si digemo veritae, che eremo prezenti quando Maria fo spoza". Disse lantó Pillato: "E ve demando in lo nome de Sezaro che voi me digai se ello è nao de fornichaciom o non". Elli dissem, so fo quelli XIII: "A noi non apertèm zuigar, ma e l'è veritae che ello non è nao de fonicaciom[sic]". E lantó Ana e Caiffas e monti atri dissem a Pillato: "Tu crei a questi so che dixem, ma a noi pá che ti non ne vogi cre'". E lantó Pillato comandà che tuta la murtitudem de la gente inssisem de fora salvo II- de lor, li quai devessem dí la veritae de questa question, e comandà che messé Ihu. Xe. fosse menao da parte, e poa Pillato disse a questi II- chi eram romaxi: "Dime qua è la caxom per che li Zué vorem che questo homo mora". E questi dissem a Pillato: "Segondo che noi amo odío dí, si è persochè ello cura li maroti in lo di de sabaot, e monti atri mirachuli o fa che monti atri homi non porem fá". Disse Pillato: "Doncha per bem fá elli vorem che ello mora". E lantó Pillato, pin de ira, insì fora de lo paraxo e disse a li Zué: "L'ato dee me sea testemonio che e non trovo in questo homo niguna caxom". E li Zué dissem a Pillato: "Se questo non fosse mafató e non te l'avereimo menao davanti". Disse lantó Pillato: "Pigaillo voi e zoigaillo segnodo[sic] la vostra leze". Dissem li Zué a Pillato: "A noi non è licito zoigá nissum". E Pillato intrà in lo paraxo e piamà messé Ihu. Xe. secretamenti e si ge disse: "Dime la veritae se ti è re de li Zué" Or li Zué lo achuzavam de monte cosse, unde Pillato disse a messé Ihu. Xe.: "Ti non me parli ni respondi a questi chi t'acuxam de tante cosse". E messé Ihu. Xe. non dixea niente, de che Pillato se maravegà monto, e lantó Pillato disse a li Zué: "E non trovo alchuna caxom in questo homo, per che ello dega morí, e per che vorei-vo voi che spande lo sangoe iusto de questo homo sensa corpa ni peccao?" Alaora li Zué respozem a Pillato e si ge dissem: "Sapi per serto, se questo homo non fosse mafató e non te l'avereimo menao ni achuzo[sic], noi semo gente a chi lo nostro segnor Dee n'a daito leze per Moizes e per cossa chi fossem noi non faremo tanta cossa ni tanta falla, ma noi te digamo per veritae la maricia de questo homo, che ello non a lassao persona de Galilea tan fin chì, che ello non age prevaricao da la nostra leze". E lantó Pillato comandà a li Zué e disse: "Unde è nao messé Ihu. Xe.?" E elli respozem: "In Galilea". E lantó Pillato respoze e si ge disse: "Segnoi, se questo homo è de Galilea, voi savei bem che non lo don zoigar, che e non o zuixo de sagoe[sic] salvo de quelli de Ierusalem" Disse Pillato: "Andai doncha, e monto bem si lo mene' a Herodes, a chi s'apertèm zoigá quelli de Galilea".
Or questi doi, soè Herodes e Pillato, si stavam má inseme, e non se parlavam, e eciamdee, in lo tenpo de messé Ihu. Xe. in Ierusalem, quando Pillato ave cognosuo che messé Ihu. Xe. era de Galilea, si lo mandà a Herodes. Or quando Erodes ave visto messé Ihu. Xe., si fo monto alegro, persochè ello avea gran dexiderio de cognoselo per le grande cosse ch'e l'odiva de lé, e sperava che ello devesse fá quarche mirachulo davanti ello, e si lo incomenssà a demandá de monte cosse, e messé Ihu. Xe. non ge vosse responde, persochè o non vorea che la soa Passiom fosse inpaichá[sic], che se messé Ihu. Xe. avesse satisfato a Erodes de so che ello ge demandava, Herodes lo avereiva schanpao, e persò messé Ihu. Xe. si taxea, e questo testemonia Davit proffeta, chi dixe in persona de messé Ihu. Xpe.: "O mutui e selui ab onibus et dolor meus renovatus est". Alaora li principi e li saserdoti si stavam con li farixé, e li stavam constantementi, e acuzavam messé Ihu. Xe. davanti da Erodes, e dixeam che o churava pocho e mem aprexava Erodes ni la soa gente, e lantó vegando Erodes che messé Ihu. Xe. non ge respondeiva, si fo monto irao e, pre scregnillo, si lo fe vestí de piancho de una roba chi ge atenzea fin a li pé, e cossì revestio o lo mandà a Pillato, e questo fava Herodes persochè o vorea dá intende che o reputava che messé Ihu. Xe. fosse um mato, e si dè a Pillato tuta la segnoria che ello vorea de zoigallo, e alaora Herodes e Pillato fon faiti amixi, chi eram stati inimixi, e cossì fo conpio la proffecia chi disse: "Li principi de la terra se acordam a una vorentai incontra a messé Ihu. Xpe."
Alaora respoze messé Ihu. Xe.: "Lo mé regno non è de questo mondo, e se lo mé regno fosse de questo mondo, li mei amixi conbateream per mi in tar modo, che e non starea cossì ligao davanti ti, ni li Zué non aveream avoto bairia de dame in le toe main, e inpersò e vogo che ti sapij che lo mé regno non è cocì". Respoze Pillato: "Adoncha ti é re". Respoze messé Ihu. Xe.: "Tu lo di che e su re, e a so e sum nao, e a so e sum vegnuo in questo mondo, e asochè renda testemonio de la veritae, e tuti quelli chi sum de veritae odem la mea voxe". Disse Pillato: "Che cossa è veritae?" E messé Ihu. Xe. disse: "La veritae si è nasua in terra e è desseiza de cel". E Pillato disse: "Doncha in terra non è veritae". E messé Ihu. Xe. disse: "Cognossi quelli che dixem veritae, ti chi ai possansa, avanti che ti zoigi". E lantora Pillato lassà messé Ihu. Xe. in lo paraxo e insì fora a li Zué e si ge disse: "E vogo che voi sapia[sic] che e non trovo in questo nissuna caxom de morte". Respoze li Zué a Pillato: "Questo si a dicto che ello porea desfá lo tenpio de Dee e che in tre jorni o lo porea refá". Disse Pillato: "Qua è quello tenpio?" Dissem li Zué: "E l'è quello che Saramon ediffichà in IIII-VI agni, e questo dixe che o lo desfarà e refarà in trei jorni". E lantó Pillato ihamà li servioi de lo tenpio e li saserdoti e leviti e li atri megoranti, e si ge disse: "Noi non voreimo fá questo, ma persochè e non lo trovemo degno de morte per questa vosta cuxa[sic], ni anchora per la soa incarnaciom, ni per ronpí lo di de sabaot, ma e lo farò bem bate, e poa e lo laserò andá". E lantora tuti li magoranti Zué dissem a Pillato: "Aschotane, piaschu chi a gastemao Sezaro è degno de morte, e se quelli chi an iastemao Sezaro son degni de morte, monto pu sum degni de morte quelli chi iasteman Dee". E Pillato comandà a questi che insisem fora, e poa piamà messé Ihu. Xe. e si ge disse: "Che voi-tu che fassa de ti?" E messé Ihu. Xe. respoze e disse: "Moizes e li atri proffeti am anoncio la morte e resuresiom mea". E odando so li Zué dissem a Pillato: "Como voi-tu pu odí nova mao iastema?" E Pillato disse: "Segondo la vostra leze si lo zuigai". E li Zué dissem: "La nostra leze dixe che se archum homo pecca contra l'atro, che ello abia IIII- pate, e che se o pecca contra Dee, che ello sea alapiao". E Pillato disse: "Pigailo voi e zoigailo segondo che voi vorei". Dissem li Zué a Pillato: "Noi vogamo che ello sea cruciffichao". E lantora goardando Pillato a tuta la mutitudem de la gente de li Zué, e monti ge n'eram che pianzeam, e Pillato disse a tuta la murtitudem: "Vorei-vo voi che ello mora?" Disse Pillato: "Qua è la caxom per che o vorei pu che ello moira, persochè ello dixe ch'e l'è Figor de Dee?" E um Zué, lo qua avea nome Nicodemo, e disse: "E o monta vota parlao con la murtitudem de la gente e ditoge: Che avei-vo voi a fá con questo homo? Lasailo andá, per li segne' che ello fa si sum de Dee, e se elli non saram de Dee, elli se desfaram, che Moizes fo mandao da Dee e fe monti segnai in Egito, e Dee ge avea comandao che ello feisse quelli segnai in lo sconspeto de re faraom, e semegeivementi Ionas e Macribios fem li segnai che aveam faito Moizes, e quelli de Egito li tegneam per lo Dee, ma pu a la fin elli non duràm, persochè li lor segnai non eram de Dee, e persò lasai andá questo, che se li soi segne' non saram de Dee, elli se desfaram, persò ello non e degno de la morte". Dissem li Zué a Nicodemo: "So che ti parli, noi vegamo che ti parli per ello chi t'a faito so desiporo". E tuti li Zué si incomensàm de mormorá, e lantó Pillato e Nicodemo dissem a li Zué: "Perchè ve contruba-vo voi contra de questo chi dixe la veritae?" E li Zué dissem a Nicodemo: "Pendi[sic] sorve ti queta[sic] veritae e abi parte con ello". Disse Nicodemo: "In veritae e la prenderea vorentera". E incontenente uno[sic] atro Zué se levà suza e pregà a Pillato che o ge lasase dí archune cosse, e lì Pillato disse: "Di so che ti voi". E quello disse: "Per III-VIII agni e era staito in grande firmitae, e mi vegando che messé Ihu. Xe. avea deliberao monte persone da li demonij e monte marotie, e l'avea sanai, e monti poveri chi avem piete' de mi si me portàm inter lo leto davanti a ello, e ello abiando piete' de mi si me disse una parolla: "Tolle grabatu tuum et anbula" so è a dí: "Prendi lo to leto e vatene". E incontenente e foi sanao a quella parolla". E li Zué dissem a Pillato: "Demandage in che iorno fo faito so". E ello disse: "In lo sabaot". E incontenente um atro disse: "E mie era sego e incontenente, quando messé Ihu. Xe. passà, e ge pregai ch'e l'avesse mizericordia de mi, e ello me misse le main sum li ogi e incontenente e resevei la vista". E um atro vegne con monti Zué e disse: "Mi era sordo, con la soa parolla e odì". E um atro disse: "E era rango, e incontenente e foi drito". Uno atro disse: "E era levorzo, e con la soa parolla e me mondai". Una femena, la qua avea nome Velonicha, crià monto forte da la longa e disse a Pillato: "E avea portao lo fruso de lo sangoe per agni XII, e como e tochai la soa vestimenta e foi sana". Disse li Zué: "Noi amo in la leze che femena non dè esse resevota per testemonia". E monti homi e femene dixeam: "Questo homo è veraxe proffeta e li demonij ge sum suditi, ma e non samo per che questi nostri principi non ge seam sugeti". E li atri disse a Pillato: "Ello a resusitao Lazaro chi za per quatro iorni era morto e sepelio in lo morimento". E Pillato odando queste testemonie si fo quaxi spaventao e disse a la murtitudem de li Zué: "Perchè vorei-vo voi spande lo sangoe innosente?" E poa ello piamà Nicodemo e quelli XII chi aveam proa como Ihu. Xe. non era nao de fornichaciom e disse: "Che faremo noi de questo per chi è si grande remó in lo povo?"
Disse Pillato: "Lo nostro[sic] segnor Dee chi ve trè de Egito e de lo poi de faraom, e feve pasar per lo má Rosso como per via secha, e norigàve de mana de cel e per IIII- agni in lo dezerto, e si ve avea faito segnoi de lo mondo, e a la fin voi dixeisti che o non voreivi che o fosse vostro Dee, e feisti um vello de oro e de argento in canbio de ello, e adorastilo como dee". Respozem li Zué: "Segnoi noi non digamo per voi, che e samo bem che Sezaro è re e non Ihu., avegnachè li Magi ge offeresem[sic] don como a re, ma odando Erodes che ello era nao11, si lo vosse fa ocir, ma sapiando Ioxep e la Maire, si se ne fuzin in Egito con ello, e Erodes fe amassá tuti li figi de li Zué chi eram fin a le etae de doi agni". E Pillato, odando queste parolle de li Zué, si incomensà a teme e a fa fá silencio a lo povo, e disse: "Doncha questo è quello che serchava Erodes per dage morte". Alaora Pillato vosse satisfá a li Zué de quarche cossa e si ge disse: "E castigerò questo homo, si che o sarei contenti, e poa e lo laserò andá per li soi fati, che per serto ello non è degno de morte". E alaora messé Ihu. Xe. fo vestio de una porpora tuta squarssá12 e bruta e si fe fá una corona de spine monta agussa, e si ge la fe mete in testa, e poa o lo fe fragellá, e cossì o lo fe aprezentá a li Zué e si ge disse: "Segnoi, vei-vo voi lo vostro re e pone mente se ve l'o bem castigao, asochè ello non diga mai che ello sea re". E questa fo la proffecia de Davit proffeta chi disse, in persona de messé Ihu. Xe., chi disse: "Ego fui fragelatus tuta nocte e castigacio mea in matutinis". Anchora non fo contento li Zué de tute queste derixiom chi eram fraite[sic] a messé Ihu. Xe., e elli veiva bem che ello aveiva si nicia tuta la fassa per testa e per busto, che ello pioveiva tuto sangoe e non se poiva sustegní sum li pé, e li Zué incomensàn tuti a criá a Pillato: "Crucifige, crucifige eum!" E Pillato respoxe: "Vorei-vo voi ch'e crucifige lo vostro re?" E li Zué respozem: "Noi non amo re, salvo Sezaro". E Pillato vosse anchora trová modo per scanpá messé Ihu. Xe., e si lo menà inter la camera, e si ge demandà de monte cosse a le que' messé Ihu. Xe. non respondea. Alaora Pillato ge disse: "Perchè non me respondi-tu? Non sai-to che e te posso dá morte e scanpate, se vogo?" E per queste parolle o se condanava in lo conspeto de Dee, e si non se po schuzá che ello non avesse corpa in la morte de messé Ihu. Xe., segondo la soa mesma testemoniansa, e inpersò, quando Pillato ave cossì testemonio, e messé Ihu. Xe. ge respoze e disse: "Tu non avereissi nusuna possansa sorve mi se ella non te fosse daita de sorva a lo me Paire, ma sapi bem che quelli chi m'an daito in le toe main, si an mao peccao che ti non ai".
consegàm a lo povo che elli demandasse Barabam e devessem fá morí messé Ihu. Xe.. Or quello Baraban si era lairon e avea morti doi homi a grande traimento. Or Pillato disse anchora a li Zué: "Qua vorei-vo voi de questi doi sea lasao?" E li Zué respozem tuti a una voxe: "Noi te demandamo Barabam". Disse Pillato: "Che faremo noi de Ihu. Nazareno a lo qua è dicto Xe., e che vorei-vo voi che fassa de lo re de li Zué, in lo qua e non trovo archuna caxom de morte?" E tuti quelli respozem: "Moira! Moira e sea crucifichao!" Alaora Pillato respoze: "Segnoi, andai, voi chi avei la vostra leze e si lo crucifichai, che e non vogo spande lo sangoe iusto". E li Zué respozem: "Noi non demo ocí nissum, ma e te digamo una cossa, che noi te acuzeremo a Sezaro inperao, che tu é treitó de lo inperio, quando tu non fai iustixia de questo homo chi se fa re de li Zué". E Pillato, vegando che lo povo se vore' levá a remó contra de ello, persochè o non vorea dá morte a messé Ihu. Xe., e si se spaventà e vegne a fá a la soa vorente' e lasà andá Barabam, chi era omicidiario e lairo, e messé Ihu. Xe. o li[sic] dè a li Zué, e zoigà che ello fosse crucifichao, che, se ello non avesse zoigao messé Ihu. Xe., grande breiga sarea staito contra ello, e si se fe dá de l'aigoa a le main davanti a tuto lo povo e disse: "E sum inocente e sensa corpa de lo spanentamento13 de questo homo iusto, ma voi atri goardaive como e ve facia". Respoze tuto lo povo: "Lo so sangoe sea sorve noi e sorve li nostri figi". E lantó messé Ihu. Xe. fa[sic] daito in le main de li Zué e de li megoi chi ge fossem, asochè messé Ihu. Xe. feisse a lor vorentai.
Quando Pillato ave inteizo so, si ave grande poira e tornà a messé Ihu. Xe. e si ge disse: "De unde e-tu?" E messé Ihu. Xe. non ge respoze niente, e alaora a Pillato ne fe gram má, e voselo lasá andá, e li Zué criando dissem: "Se ti lassi andá questo, ti é inimigo de Sezaro". E quando Pillato inteize so, si ave grande pensé, e asetàse in lo logo unde se dava la sentencia de li maifatoi, e lo qua logo se dixea in lenga ebraicha 'Golgatas', e fe vegní messé Ihu. Xe. in mezo de la piasa, e era lantora l'ora de tersa, e li Zué piamavam quello iorno 'parasene', chi tanto vo dí como 'apariciom', soè 'aparegamento', persochè li Zué deveam aparegá tuto quello chi fava mesté a la Pasqua, e lantó Pillato disse in grande voxe: "Veve chì lo vostro re". Dissem li Zué con grandi crij: "Crucifichaillo!"
Disse Pillato: "Crucifichere' lo vostro re?" Respozem li Zué: "Noi non amo atro re, sarvo Sezaro inperao de Roma".
Or, vegando Pillato che o non zoava niente, ma e l'era per esse mao remó inter lo povo, si comandà che messé Ihu. Xe. fosse desligao e che o ge fosse menao davanti, e menao che ello ge fo Pillato disse: "E dago sentencia contra Ihu. Xe., persochè la soa gente dixem che ello è re, e persò sea condanao segondo li statuti de li antigi principi e poa sea levao in croxe, e con ello doi ré homi". E cossì fo faito.
Or ello era tanto deber e seive per li grandi tromenti che elli ge aveam faito, per che ello non poiva portá. Or andando elli trovàm um homo chi vegniva da la villa, lo qua avea nome Simon paire de Alexandrio Rufin, a lo qua elli ge lo fem portá fin a lo monte Cravario, e quando lo Segnó andava a lo logo de la iustixia, la Madalena vi che e ge lo menavam, e ella crià forte a la nostra Dona, chi sospirava a la terra: "Vene tosto Madona, echate lo to Figor chi e menam a la morte, e se ti lo dei mai vei vivo, si te sfrasa de vegní aora". Or quando la Maire odì queste parolle, pensai se ella ave angustia a lo so cor, e sforsà la soa forsa, chi tuta era mancha, e criava senper como ella poiva, e dixea a li Zué: "O jente sensa mizericordia, perdonai a lo mé Figor e prendei la Maire, e se non vorei perdoná a lo Figor, daime la morte conseigo in conpagnia". La Dona si goardava a lo so Figor e veiva che o non poiva reze lo legno de la croxe, e se butava avanti per vorei aiá so Figor e per vorei pernde[sic] lo legno de la croxe, ma la jente si la rebutavam fora e si ge criavam adosso, e ella, con monte atre done de Ierusalem, segoivam messé Ihu. Xe. e andavange pianzando apreso, e messé Ihu. Xe., vegando lo grande dolor che la sao[sic] Maire con quelle atre done favam, si se vozè inver lor e si ge disse: "O figore, non pianzei per mi, ni sorva de mi, ma pianzei per voi e per li vostri figi, che certo o verà tenpo che se dirà: Beneiti seam li corpi de quelle femene chi non am inzenerao, e beneite quelle mamelle chi non am alaitao. E in quella ora se dirà a li monti: Cazai sorve noi, persochè, se elli fan so in lo legno verde, soè sensa archu peccao [...] vostri figi chi sum legno secho, zoè chi sum peccaoi, che ne sarà faito?"
Queste cosse o l'avea bem dicte Davit proffeta in persona de messé Ihu. Xe. quando o disse: "Foderunt pedes meos in manus meas et dinumeraverut omnia ossa mea". Quando elli avem cossì piavao messé Ihu. Xe. sum la croxe, como e o dicto, elli si preizem li doi lairoin che deveivam morí per fruto, e si li ligàm sum le doe atre croxe, e si misem l'una da una banda da messé Ihu. Xe., e l'atra da l'atra, soè si Dinas da la banda drita e Iestas da la senestra, asochè fosse conpío la proffecia chi disse : "Et con inpijs deputatus est", soè che lo Figor de Dee si è zoigao con li mravaxi e sarà tegnuo tá como elli. E quando messé Ihu. Xe. fo crucifixo da li cavaler de Pilato, si preizem le lor robe e femne quatro parte, persochè elli eram quatro, e messé Ihu. Xe. era lo V, e romaze quella soreta unde non era nissuna costura, e questa era quella che la soa Maire ge avea faito con le soe main, e quando li cavaré vin quella vestimenta, si la vosse squarsá, e vegando elli che e l'era cossì bella, si fo um chi disse: "Non partimo questa vestimenta, ni la ronpimo, avanti, fasemo a le sorte de chi ella dè esse". E questo ave bem dicto Davit proffeta in persona de messé Ihu. Xe. chi disse: "Divixerunt sibi vestimenta mea et super vestimenta mea miserunt sortes", chi tanto vo dí: "Elli am partío le me' vestimente e sorve la mea vestimenta e an butao le sorte". Or Pillato avea faito scrive sum una tora um tituro chi dixeiva: "Ihu. Nazarenum Res Iudeorum" e in quello titullo era letere grege, braiche e latine, e questo tituro fo ihavao in cima de la croxe, e persochè messé Ihu. Xe. non ge poiva atenze de la testa, elli la possàm sum la spala drita, persochè ello non avea unde possá la testa, e de so avea za dicto messé Ihu. Xe. de lé mesmo: "Le volpe in fose e in tane, li oxelli a nio, ma lo Figo de la Vergem non a unde mete la testa". Or lo logo unde fo crucifixo messé Ihu. Xe. era si rente a la citae che tuti quelli chi saveam letera lo poivam andá a leze, quello titulo, e li principi e li saserdoti, vegando che Pillato avea faito quello titullo, e si ge dissem: "Tu non ai ben faito quello titullo, che ti di: re de li Zué. Anti dei dí: che ello lo dixea, che ello era re de li Zué". Respoze Pillato: "So che o scripto si è scrito".
Or ello vosse conpí lo so testamento ch'e l'avea incomensao: ello avea za alogao a li apostori paxe e caritae, e a li Zué lo so corpo, e aora, in questa primera parolla che ello disse, si alogà mizericordia a li peccoi. O peccao, non te lassá levá la ereditae che t'a lassao lo to Paire, e sapi per serto, o da de questa hereditae pu a chi ne vole e a quelli chi sum peccoi como a quelli chi sum piseni peccoi, e sapi che ello non da a schuza mizericordia, inpersochè ello n'a bem tanta che o non dubia che a ge manche. Or peccoi agemoge bona vorontai, che se fossemo migaira che e non semo moi peccoi anchora la soa mizericordia è mao che non è la nostra iniquitae.
a lo mego che o poè si ge disse: "Ti, Segnor, abi mizericordia de mi peccao e arecordate de mi quando ti sarai in lo to regno". E lo Segnor si ge respoze: "In veritae e te digo che anchoi sarai con meigo in lo mé regno".
Quando ela ave odío doa vota la voxe de lo Segnó e como ello lassava a li peccoi mizericordia e a lo lairon vita eterna, e si veiva che lo sangoe era quaxi tuto spainto, e ella incomensà de parlá a lo so Figo segondo che ella poè, e disse: "O Figolo, te ai-to cossì adementegao la toa Maire? Non ge son-e anchora scrita? Lassa, Figor, a la toa Maire la morte, e fa che ella sea tosto. O Figor, perchè m'a-tu cossì indurao? Za me voreivi-tu bem". Respoze alaora lo Segnó e si ge goardà e si ge disse con lagreme: "O Dona, ti fai cotai pianti, lo to pianto me da mao peña che non me da la mea passiom. Non vei-tu che faso so che vo lo mé Paire? Non savei-vo che e dum resusitá? Echa chì lo to parente Zoane, questo sea lo to figo". E dapoa o piamà messé san Zoane e si ge disse: "Figor, questa sea la toa Maire, e te l'arecomando". E in quella ora lo desiporo la reseivè per soa Maire, e cossì messé Ihu. Xe. arecomandà soa Maire a messé san Zoane evangelista.
son roti? O Figor, como po esser che elli te agem misso sum la croxe tuto nudo e despogao e si te lassàm sechá de se' e si non te dam in pocho da beive?" E poa la Dona se vozea inver la gente e si ge dixea: "O gente sensa mizericordia do[sic] prendei pietae de questo mé Figor Dee, chi me mostrerà unde fosse in pocho de aigoa?" E in tá guiza pianzea la Dona e goardavasse intorno per vei chi avesse pietae de lo so Figor e chi ge prozesse da beive. Or, stagando cossì, echa vegní um chi portava um vassello pin de mira pesta, chi e monto amara, chi era mesiha con felle e axao, e pigàm una cana e ligàge in cima una sponza e bagnàm la sponza in quello vassello e si la porzèm a la bocha de messé Ihu. Xe., e quando lo Segnó l'ave asazá, per la grande amaritudem si la lasà stá e incomenssà a centí grande dolor per tuto lo corpo e butà un grande crio a grande voxe digando: "Eloi, eloi, eloi lama zabatani", chi tanto vo dí como: "Dee, Dee, Dee, perchè m'ai-tu abandonao?" E lantó e fon archuim chi se cretem che lo Segnó ihamasse Elia, e um de lor corse in corpo a pigá la sponza e bagnalla in lo vassello chi era possao a pe de la croxe, lo qua era pin de fel e de axao, e vollea porze a la bocha de lo Segnor, e li atri si ge criàm e ge dixeam: "Lassa stá, e veiremo se ello verà a desende zu de la croxe". Or e l'era circha la ora de noña, e vegando messé Ihu. Xe. che tute cosse eram conpíe, e asochè la scritura se conpisse, si disse inver lo so Paire: "O Paire mé selestiá, perchè m'ai-to cossì abandonao? Ormai non resta pu peña chi non sea vegnua in mi. Or è consumao ogni cossa per che ti m'ai mandao. Ormai è conpio tuto quello che a proffetezao li proffeti per mi. Paire, in le main toe, e arecomando lo me sprito". E dicto che ave lo Segnó queste parolle, l'anima se partì da lo corpo e inchinà zu la testa e reize lo sprito. Or incontenente lo vello de lo tenpio se ronpì da la cima fin a la porta de sota, e la terra incomensà a tremá, e le pree se ronpìn e lo cel se incomensà a oschurá e fo faito tenebre per tuta la terra, tan fin a la ora de vespo, e li morimenti se arvìn e li morti resusitàm, e so fo monti corpi de santi homi chi dormivam, e vegnem in Ierusalem apreso a monta gente. Or archuin dixem che o non fo faito tenebre per tuto lo mondo, salvo per la terra de Iudea, cossì como fo faito in Egito per lo tenpo de Moizes, e non in atre parte, persochè faraom non vorea lasá andá lo povo de Dee, ma noi demo cre' tuto quello che dixem li evangelista, chi dixem che fo faito tenebre per tuta la terra, e presò lo só se aschurì.
Or elli zem e ronpìn le ganbe a quelli doi chi eram sum la croxe con messé Ihu. Xe. cruciffichai, e quando elli vegnem a messé Ihu. Xe. per fage atre ta, si trovàm che ello era za pasao de questa vita e non ge vossem ronpí le ganbe, e in so fo conpio so che disse la scritura, zoè che: "Voi non me ronpire[sic] osse de quello", ma um de li cavaler, chi avea nome Longin e era za vego e avea perdoto[sic] la vista per grande marotia che ello avea za avoto, e disse: "Meteime la lanssa per mezo lo costao de questo e si saverò se ello è morto". E quelli lo fem. E quando Longin ave la lanssa per mezo lo costao de messé Ihu. Xe., ello inspense per grande forsa, segndo[sic] che o poè, e passà la lanssa per mezo lo costao de messé Ihu. Xe., e, passando in doe parte, incontenente o ne insì sangoe e egoa, e quelli chi vin so, si ne reizem testemonio, e lo so testemonio fo veritae, e quello corpo Longin lo fe in lo costao drito de messé Ihu. Xe., e quando ello l'ave faito, lo sangoe corse zu per la lansa, e in pocho de quello sangoe intrà in lo ogio de Longin, de che ello fo incontenente inluminao, e veiva si ihairamenti como li atri, e ello, vegando so, si se convertì a messé Ihu. Xe., e poa o fo sainto e resevè morte per lo amó de Dee, e tute queste cosse fon faite perchè le scriture se conpisem, onde o dixe: "O verà anchora tenpo che elli veiràm anchora quello che am ferio". Or senturion chi era cavo de quelli cavaré chi era staito a cruciffichá messé Ihu. Xe., vegando le mainere e lo modo per che era staito cruciffichao messé Ihu. Xe., e le maravege chi eram intervegnue, si gloriffichá Dee e disse inver li atri: "Veraxementi questo homo era justo, e si e da cre' che ello era Figor de Dee". E grande gente chi eram vegnui li per vei questo grande faito, e vegando so che era staito, si se ne retornàm ihamandose in corpa e dagandose de le main sum li peti, e inter quella gente si g'era santa Maria Madalena e Maria Iacobi e Maria Solome e Maria de Ioxep, e Pillato, vegando so, e soa mogé, si fon monto pentij, e tuto quello iorno e non mangàm ni bevèm per grande despiaxi[sic], e lantó Pillato congregà monti Zué e disse: "O avei tanto faito che lo segnó Dee e irao contra de voi, e persò lo sol e oschurao". E li Zué dissem: "Questo è staito per corso de raxom e non per atro".
Or questo Ioxep odaciozamenti se ne ze a Pillato e demandà lo corpo de messé Ihu. Xe. e Pillato se maravegà monto che messé Ihu. Xe. fosse za morto, e lantora o ge mandà senturiom per vei se ello era morto, e quando o sape ch'e l'era morto, si se ne maravegà per so, e lantora Pillato comandà che lo corpo de messé Ihu. Xe. fosse daito a Ioxep, e lantora Nicodemo e Ioxep vuegnem[sic] e adussem con ló mira e aloè, quaxi lbr. C, e preizem monti feramenti e si levàm lo corpo de lo Segnó zuza de la croxe, e quando lo nostro Segnor fo desihavao zu de la croxe, cossì sangonento como e l'era, si fo daito in braso de nostra Dona, e lantora se incomensà li pianti e li sospiri, e la nostra Dona incomenssà a regoardà la soa testa, e veivala pina de spiñe, e la soa fassa tuta canbiá, e con grandi lamenti a dixea: "O dosse Figo, perchè ai-to vossuo lassá la toa Maire in tante peñe, e perchè non ai-to vosso[sic] che more conteigo?" Pigava la Dona le brase chi pendeivam zuza e veiva le maim chi eram tute squarcai, e poa con grandi sospiri a dixea: "Audite celi que loquar, audite terra verba oris meis". Disse la Dona: "Odi so che e parlo, o terra, ascondi le me' parolle, veive le main chi v'am formao, e voi l'avei bem cognossuo, che voi per la soa morte avei mostrao spavento e dolor". La Dona goardava li pé de lo so Figor e veivali tuti ihavai, e con amari pianti a dixea: "Questi sum li pé chi andavam super lo má". E poa a se vozea inver la Madalena e ge dixea: "Lo cel e la terra e l'aigoa e tute le creature insensiber am cognosuo lo mé Figor e si g'am faito reverencia, salvo lo so povo mesmo, si inimichus meus maledisicet mi sustinisem ut iam" chi tanto vo dí che: "Se li soi inimixi l'avessem malixio e morto o serea pu da sostegní, ma quelli che lo mé Figor ameistrava, mondava, passeiva e sanava si me l'am morto". Dapoi questo lamento Ioxep ab Arimatia e Nicodemo preizem lo corpo de lo nostro Segnó e basemanllo con quelli inguenti segondo che er[sic] uzansa de li Zué, e seperinlo. Apreso lo logo unde fo cruciffao messé Ihu. Xe. o g'era um orto, e in quello orto o g'era um morimento novo in lo qua non g'era mai staito sepelio nissum, e per amó de la festa chi era, si lo missem in quello morimento de prea, e lo qua era cavo, e a la bocha de lo morimento e ge missem una grandissima prea.
Alaora la Vergem se partì de lì con la conpagnia de la Madalena e de le atre dee[sic] chi vegnivam pianzando speso a ella per la grande conpassiom che elle aveam. Or quanto era lo dolor e l'angustia che ella avea quella chi avea perdo[sic] si fato[sic] Figor, e per questo dolor a cazea speso in le brasse de le atre done e andava digando, como ella poea mego: "O vos ones qui transistis per viam antendite et videte si est dolor similis dolor meus qui dabit aquam caput in meo oculis meis fortem lacrimas et prorabo diem ac nocte" chi tanto vo dí: "O voi tuti chi pasai per la via, astalaive e goardai se è dolor semegeive a lo mé, qua sarà quello chi darà de l'aigoa a la me' testa e a li mei ogi fontana. O angero Carbir, como e me tornà la toa salutacio in grande amaritudem, tu me dixeivi 'de gracia piña' e aora e sum pina de grande angustia, ti me dixeisti 'dominus techum', ecame questo me Figor, questo me Segnó, questo me spozo si m'è staito levao e morto, ti me dixesti 'benedicta sorve tute le atre femene', echa che sum la pu dolente Maire chi fosse mai in questo mondo, si me dixivi[sic] 'benedictus ventris tui', echa como o m'è stao iastema[sic] e marixio da lo so mesteso povo. O morte, como me e-to steta crudera, per che me fossi-tu cossì contraria, quando ti me lasasti depoí lo me Figor in tanto dolor e in tanta amaritudem?" Or la Dona se ne tornà a monte Cravario, unde lo so Figor era staito morto, e tornàsene in Ierusalem e stete in una caza será in grandi pianti e sospiri tan fin a la resuresiom.
Figor de Dee, persochè ello fava de monti grandi segnai, ma e o dapoa sapoto[sic] per certo che è pu homo, e persò e o faito tanto che um so disiporo l'a traio e venduto per trenta dinari a li Zué, e quelli per invidia si l'an crucifficho[sic] e faito morí a grande tromento, e persò pensai de prende l'anima soa chi desende zuza a lo linbo a stá con le atre in nostra bairia". E quando lo mao de li demonei ave cossì parlao, uno atro de lor respoze e disse: "Questo è quello chi resusità l'atro jorno Lazaro". E tuti li atri respozem che cossì era, e quando li atri demonei avem inteizo so, elli incomensàm a criá e dissem a lo principo de lo inferno:
"O mizero dolento, como e-tu staito inganao, che veraxementi questo è Xe. Figor de Dee, per lo qua o covem che lo to regno sea destruto.
O dolorozo, za non vei-tu ihairamenti che questo non avea mai peccao? E non lo vei-tu bem che e l'è morto de soa vorentai? E si savei bem che ello poiva schivá la morte. Ello non vosse, ma o se misse liberamenti in le maim de li Zué".
Or a questa desputaciom che favam li demonei, li sainti pairi chi eram lì dentro si se incomensàm tuti alegrá inter lor, e inter liatri parlà sam Zoane Batesto e disse: "Segnoi, daive tuti bon conforto, echave quello che e batezai in lo mondo, ello è morto per noi, e si a spainto tuto lo so sangoe per pagá lo nostro debito e per tráne fora de questa prexiom".
Quando lo Batesto ave conpio queste parolle, lo nostro Segnor crià la segonda fia e disse cossì como ello ave dicto avanti, e disse: "O principo de queste tenebre, leva via le porte de lo inferno e si verà dentro lo Segnó de gloria". E li angeri chi eram con lo Segnó respozem: "Questo è lo Segnó posente e forte chi a vensua la grande bataga". E lentó[sic] li demonei seravam e fermavam le porte, tuti ge eram dentro e tegnealem forte asochè o non ge intrase, e lantó lo nostro Segnó ronpì le porte e butàle per terra e deseize in lo inferno e con grandisima luxe e preze lo principo de lo inferno con tuti li soi suditi, e si li ligà con grainde caine e si desipà per tá goiza tuta la lor posansa, che elli non poea pu noxe ni vense homo vivente, se lo homo no se vo lassá vensse. E quando elli fon cossì desipai, si vegne messé Ihu. Xe. a lo linbo, unde era messé Adam, e si lo sarvà, e si ge disse: "Paxe a sea a ti, Adam, con tuti li toi toi[sic] figi elleti". E digando lo Segnó queste parolle, tuto lo linbo fo pin de luxe, e alaora tuti li santi pairi chi eram in quella perxom si adoràm monto umermenti lo Segnó, loando e regraciando la soa begnigitae[sic], e dixeam: "Benedictus qui venit in nomine domi[sic]". E alaora lo Segnó preize messé Adam per l'una man e Eva per l'atra e disse a liatri: "Vegnie tuti fora", e misese avanti a tuta questa beá conpagnia, e si li menà a lo pareizo terresto, unde li stem fin a lo iorno de l'acenciom, e messé Ihu. Xe., cossì como voi avei inteizo, lo nostro Segnor desipà lo inferno e liberà lo homo chi era prexom.
grande dolor e poira che lo povo non li aremorice, per che elli dem monti dinari a le goardie e si ge pregàm che elli devessem taxei queste parolle, e quelli ge promissem de non parláne mai.
"O Paire celestiá, ti fosti quello chi me mandasti questo to Figo non per la mea vertue, ma per la toa bontae. Piaxete, Paire me, che cossì como e l'o visto ocir, che e lo vega resusitao". E poa a dixea a lo Sprito Santo: "O Sprito paracrito e consolaciom, consola la pu angosoza Maire chi fosse mai, e cossì como per ti, Sprito Santissimo, e per la toa operaciom, che questo to Figo deseize in mi, cossì te piaxe de menamelo aora, asochè lo tromento chi romaze in mi per la soa morte se parte da mi per la soa resuresiom". E poa a piamà lo so Figor e disse: "O docisimo Figo me, meti zomai termem a lo sprito de la toa Maire, sana l'anima soa chi è feria de um ihoo, e so bem Figor che ti odi le me parole, piaxete per lo to amó de consoláme".
o regina de lo cel e de li angeri, echame cocì, lo fruto de lo to ventre, lo qua ti ai daito a saná a la umana generaciom, e inpersò, Maire mea, aora e te arecomando li peccoi e si te lasso lor avochata, e tuta la mea gracia e te la dago in bairia, che ti ne sei dispensarixe e non sei scrasa a li peccoi". Or quanta era la consolaciom sprituá de la Dona, e quante lagreme de piete' a spanse. Or quando lo Figo ave conpio le soe parolle, la Dona respoze: "Ecce ancila dni. fiat mihi secundum verbum tuum".
Note
- ↑ aggiunta una i a pigà
- ↑ aggiunta una i a mangià
- ↑ aggiunta una i a figio
- ↑ la i sembra cancellata
- ↑ tratto confuso
- ↑ drotrina con la prima r cancellata
- ↑ sangiao corretto in sangonento
- ↑ sarserdoti con la prima r cancellata
- ↑ tratto confuso
- ↑ in tutte e quattro le occorrenze faso è corretto in facio
- ↑ forse nou corretto in nao
- ↑ squassá con una tilde sulla u
- ↑ oppure spaventamento
- ↑ camcho corretto in canbio